Jhaung: mho' na gelang:

Bam byu jham re myen gye jham aqug' akhai: byid,
gye se' se' ru alaug shid' zin ngaid lo'' na: ava''

Lhaovo bam na: ra'' joqo Vai''mo: Shaphaui , Pangva: qan'' qan'' gye boe'' mung:
Lhaovo myhi'' pho'' mao: nhaung: damyo'' gyai na qug' na ko'' ru re myid ke' lao''
nhag' mae zao'' ra''.

Mo''so jhao'' jhaung: mho' ra'' , yaug yo, ra'' jeju re byid' gae: na shi: la, asang we'' .
Daba: daba ga'' re bana lho'' khye' zin lam: tha'' lo'' na ngaid mase''
nyhao: nhae qho' ra'' suna azhao'' wa je: qi'' qhang; lo nhae'' khyo mabung'' ru tho'
je: qug' qae'' ru thaung'' qhug' lo: ru mae , Mo''so ra'' nhag' khyag' myid mae ayo, mamyao'' re
yaug yo, qi: qhang: gang'' tang lo sho' jhaung: laug laug ceim'' mho' na bam: gelang: ein:
o: lhaung: ke' ra'' o''.

ni'' nhaung'' alhab ra'' ,

myu'' jhid' zolau:

Back Again

Lhaovo zalau: is back again. Mau'' laug na: yang: blog maqo'' tung'' ru gyai myhao'' byaug va''.
Ana'' ba mae'' wa dam: thaug' qhao'' qu'' nae'' khyo: ngaid va''.

Ana'' au: ra'' taung mang: khyo

Jhid' de, ra'' Lhao nau'' mao: nhaung: jham ba se'' nava'' ein; lam ke' ra'' .

Ngo qo'' gyo'' ra'' gu'' re xo' yang: dam: gae: myho'' ke' ru ngaid.

Taungzo: gyedap re Nov 14 ba re myen gye qam: datug we' mung: vao: se' nae'' ga'' ru qo'' gyo'' ra''. Laha te' shaid' mae'' re: myen jham qhid' mae'' myi:am xashi: jham byang'' byang'' tho: ra'' Mo:do mo'' shid' ce' joe'' na ra'' ga'' ru lau dao: kyo: bao ta'' ko'' ra''.

Nyhao: maqho' ra'' taung mang: we' taungzo: byu myu'' jham re lhoi'' ru , se' ru , taung'' ru jham myo: myo zaui so'' na ko'' ga'' ru the' myao: ra''. Ai mung: jhaung: mho' qam: byid' ako'' ga: yang: re

phung: mho'' pho'' we' phung: thaug' jham, lam khug, phung:zo: jham re myig' ca mung: qobo mamyao khug mae be, khyad' na ko'' ga''.

Cara'' akhyo jham re myid ke' lao'' Mo''so mae'' lai yang; taungzo: byumyu'' qi tau myid nghae'' jao gatau majo, mamyao lo: ngaid ra'', Ai mung: Qammo'' bo: thao'' ra'' Phan'' yhamsang Mo''so: yao: bao'' thaug' yu veshao: gang: gang: jhaung: ceim'' mho' bam gelang: o''. Sangyang'' solo we' mug' lagyo: bam taung: zo: byumyu'' re bao'' yao nae'' ngaid' ein: lam'' ra''.

Lhaovo byumyu'' bam laug laug na pyo'' ra'' Vai''mo , Caphaui , Pang:va qan'' mae re: yaug yo, ra'' jeju byid' gae la, o'' Asang we''. Mo''so re ba: myid nghae'' na geshao: myo, phung'' byid' na la o''.

Taungzo: Mang: Nhgaui''

( Nyug, Lao Bam Mo'' Taungzo: Aqao: Yao: Ngaid'...

Byuxag' She' Ra'' Taung''zo: Mang: Yao: Ngaid Na'' Ra''...

Phug: Phyid, Jham Ra'' Jo;nho: ....

Phug'de, Dai''kham We' Byang'' Jo, Ra''...

Nyhao:nhaung'' Mang: , Nyhao:nhaung'' Myig,

Nyhao:nhaung'' Jhid' Nyhao:nhaung'' O: .....

Mathao'' Mabyaug, Gug:gam ...

Mugmyig' Thao'' Joe'' Sho' Gang''tang: Jo, Na Nae''..)

Xam: Shid'lhang: paug' nghaui'' nae''.

Lhaovo we' mang: khyo

Lai lo'' va'' June lho''xin: gug ba: ba mae'' taungzo: gyedap we' myen gyedap jho'' bag, qhid, lo ru ana'' ba joe'' ngaid re lho'' byid khye' byang'' nae'' nhad' ba za: aca'' lo'' ra''. Gye-se' khyo wa je: thing: li'' na ra'' ga'' ru the' myao:, qo'' gyo''ra''. Azhao: laban ta(Sep 23 we' 27 ba gyaro: mae )sae'' mang: taungzo: gyedap, Loe: kang: re: myen gyedap qam: dakhying'' je yao: ceim'' yan'' do, mung: myi:am mo'' jham we' mathang sho' lam'' lo'' bag gayang: taungzo: gyedap mae'' bao: lhau'' phao: qhui: ca'' ko'' ga'' ru qo'' gyo'' ra''. Ngaid mase'' avai: ayae tau qan'' mae'' dam: ke' bag, na ko'' ra'' ga'' ru lau dao: mae qo'' gyo'' ru ngaid.

Mang: khao: mang: ngo'' mae joe'' na ra'' jhid'de, ra'' taungzo: Lhaonau'' nao ngo'' alhab' myid beim'' na nae'' wa: nyhao: nhae qho' taungzo: byumyu'' qi: qhang khyo re jhui'' au: she jhui'' qi: qhang nae'' wa taungzo: yao; cao; yao: ngaid ra'' , ai mung: ana'' boe'' na ra'' mang: khyo , gye khyo mae Mo''so nyhao: nhaung'' we' daga'' ngaid mung: khyo jhui'' yu nae'' , aung myaug ra'' jeju byid na shao: ein: jhaung: ceim'' mho' ru we' daga'' , yham sang joe'' na ra'' jo,qo mae mang: khyo we' byumyu'' tau gai boe'' qae thaug' qhao na gyai yau: gying'' ra'' ein: the' myao ra''.

Taungzo: byumyu'' qi'' qhang: gang'' tang: lo nae'' we' yaug yo, taung'' yhamsang: mang: re qo'' yu nae'' , qo'' qi'' qhang nae'' tau ayo, khao: ngo'' beim: beim: za: thaug' qhao'' na gelang: lhe'' ein: qam: lao'' ke' ra''. Vaimo: , Myidkyina: , Chiphaui , So'Lo , Vashaung: we' taung mang: sae'' mang: qan'' mae qug' khai: qhug' na ko'' ra'' Lhao nau'' mao: nhaung: jham bin sho' we' taungzo: mao: nhuang: jham bin sho' adao mae Pho'' asang: lhaug' zaung'' qu'' gam byid' na shao: o''.

Lhaovo Politics

Jhid'de, ra'' lhao nau'' mao: nhaung: bam we'' , nyhao; nhae qho' bam bana: na ra'' byin qham myen mang: ga'' ru mae'' ana'' ce-au: re mang: khyo tha'' lhag' na ra'' yo, ngaid ra''. Mang: khyo wa qi: qhang khyo ngaid ra''. Cara'' qi: qhang khyo mae nyhao; nhae qho' bam khakhyo'' bo leim'' na ga'' ru re no, no, jid' jid' myid qu'' ca'' va'' ra'' ein: the' myao: ra''.

Yaug, yo, ra'' mang: boe'' doe, nae'' qhid' mae wa ai ra'' mang: mae na: ra'' mang: byu jham bin sho' we' tin'' ra'' mau'' zo'' ngaid ra'' , ai mathao wa nyhao; nhae qho' re: nyhao; nhae qho' ra'' thoe re kyo: ca'' ra'' , thoe kyo; nae'' qhid' mae myid qhan: dang qhan'' ru we' ngaid re she, a gai nae'' , Lhao nau'' bam dayaug, danhag' mamyid, na lo: dang qhan'' ru we' boe'' na ra'' mang: khyo , lalam lakhug we' byumyu'' qi: qhang khyo mae thoe qo'' kyo: sho' thaug' qhao'' na gelang: ein: qam: lao'' ke' ra''.

Ana'' myo; myo; ta'' na ru wa Federal Democratic Union ga'' ru ngaid ra'' , cara'' lase'' wa byin qham myen mang: mae na; ra'' byumyu'' cao jab yao; yaug yao: ra'' jo, qo mae khang'' ru we' byu myo; myo; nhag' qhan'' ru re akao to'' ra'' dang qhan'' ra'' mang: boe'' doe, sho' ga'' ru ngaid ra''.

June lho'' khye' 9 ba mae'' boe'' qhid na ra'' gyese' poe wa ana'' je: khig lo ra'' ga'' ru qo'' gyo'' ra'' .

lho'' dakhye' je ngaid lo'' va'' thao re anyi ne, July 21 ba myi re wa Vai''mo we' Laiza re xo' to'' ra'' Dabag lao zae re taungzo: asu''ya' dap ra'' gyezo: jham bom paug' phyid' pye' veko'' ga'' .

Myen gyezo: we' mo: do: jham taungzo: gyedap shaid' khyo: laui za: maqo'' de, nae'' tau phyid' pye' ru ngaid nae'' ga: gye akhyo qu'' ca: na bao: ta'' ko'' ra'' .

Laiza mae wa gyephao phao: ra'' byu 15,000 ko re myen ngaui tig 150 jan'' ging'' ra'' myicid' zai re Yinggyang'' mae'' Laha Asuya' jham sao qhid' lhang: bao'' thaug' yu ko'' ga'' ru qo'' gyo'' ra''.

Yinggyang'' qan'' na ko'' ra'' taungzo: jham re; cin thaung 200 bao'' veko'' ga''.

Myen wa taungbyu gyedap re thao'' sho' bag nae'' ga'' ra'' khyo'' seim'' nyhang'' na va'' ga'' ru re gye boe'' na ra'' vo tau mae'' mang: byu jham ta'' na ko'' ra''. Gye qam: lhaug' ru we' xashi: zo: shaug' jham laug laug tho: zhao'' lo: ako'' ga''.

Taungzo: gyedap wa myen asu''ya' re gye majho'' bag lo: kai:khau''(table) we' tao'' khau mae zaung yang: nyang'' jho'' ta'' yang: yaug yo, khyo re qho: ye'' lo'' nae'' tau mho' yao: na ru mae''

myen jham maqad maqui'' se' vao lo; ru ngaid ra''. Taung byu jham wa kharu: maba: kaid' yhamsang re se' lo ra'' mo, re yhamsang: gaung we' jo,qo re nghoe' gam ra'' khyo'' dam: se' na ru ngaid ga'' o''.

Taung mang:, Sae'' mang: we' Myen mang: re Mo''so nhag' khyag' yu veshao: , ngaui pyo'' lo veshao: o'' Amen.

taung byu gyedap jo, ra'' mae gyephao phao; qhui bao:

Lai lo va'' lho'' khye' June 9 ba mae'' myen we' taungbyu gyedap gye dam; bag, qhid ru mae'' shanglot jham up khang'' ra'' joqo, qan'' mae'' taung zo: mao; nhaung: we' gyephao phao; qhui ca'' mung: Laiza mae alaug15000 ko joe'' na ko'' ra'' ga''.

Ai bam re bao'' thaug' nae'' byu we' ngaui qhang: gyai ca'' na ra'' ga'' ru qo'' gyo'' ra'' . Ana'' au: wa shanglot dap khyo'' mae'' qu'' shaung: na ru we' UK mang: mae'' Unlimited Health ga'' ra'' phung: bao'' thaug' na ko'' ra'' ga''.

Jhid'de, ra'' Lhao nau'' mao; nhaung: jham we'' nyhao: nhae qho' joe'' na ra'' jo,qo khyi'' mae'' taungzo: mao; nhaung: bam alhab' qhid' mae'' tho' Pho'' Mo''so jhao'' jhaung: mho' bao'' na gelang: ein pyang: ke' qo'' ra'' .

Lhaovo mau'' zo'' wa taungzo: mau'' zo'' va'' , taungzo: mau'' zo'' re Lhaovo mau'' zo'' va'' ein: the' myao ra''. Kachins ga'' ra'' mang o mae Lhaovo qi: qhang: lo veshao: o''.

ni'' nhaung'' bin sho' ra''

lhao nau''

Lhaovo Khakhyo''

jhid' de, ra'' mao: nhaung: jham we'' ,

gye, jho'' se' na veko'' ga'' ru alhab' mo, qo'' gyo: ba se'' ganava'' ein lam'' ra''

taung zo: jham re se' ra'' gye ngaid ra'' mathao , nyhao: mo' Lhaovo jham re:

ai mae bo leim'' gau va'' , byu yao: mali'' se'' re lhao''

na ye, khyo , zaui: zo: mung ve, khyo mae qug qae'' ru we'

du: su khyo mae qug' khai qhug' zai va''.

Lhaovo politician re: na ca'' ra'' ein the' myao; ra'' .

Lhaovo qi re mang: khyo mae au: jhui'' she nae'' tau ca'' yao; ca'' na ava'' o''.

Lalam lakhug we' mang: khyo we' qi: qhang khyo wa bin sho' dalam: we' dalam:

xo' taui'' na ra'' mhao''.

Mo''so we'' ngomo' Lhaovo qi re jhui'' au: she nae'' wa nao Asang yao; ngaid ava''

ngaid mase'' Mo''she, ru: byu myu'' re jhui'' au: she nae''

au: jhaung jham myo; myo; byid' gae shi; la, o'' .

Lhaovo in Changing Myanmar

Jhid'de, ra'' Lhao nau'' jham we'' ,

Myen mang: wa tha'' wa tha'' lhag' lo: na ra'' , ai re: ayo, khamyho'' myao'' shi nae'' ga'' ru khag' matho' qo'' ba . Ai mung: myen mang: tha'' lhag' lo va'' ga'' ra'' dane, re nyhao: mo, Lhaovo jham ra'' suna azhao'' khatau mae ngaid nae'' ga'' ru myid qu'' gelang: lhe''.

Tha'' lhag' ra'' ga ngaid mase'' ju-i maba , ngaui qhang maqo'' , mau'' zo'' gyag, pe'' mazaui: so'' na re wa qi; qhang khyo mae thao gyo'' na shi: zai ngaid ra''. Ana'' wa zag, to'' ra'' o mae na ca'' ra'' , kaid' nug ra'' ja; magai: kaid' , mho nug ra'' ja: magai: mho: ra'' ayo, , byumyu'' sam''ve, tung'' ce' we' qi: qhang: khyo re tam'' phyid' to'' ra'' akhyo myo'' laug' na ru ngaid ra''. Mug' caid' khug mae ein: gai ta'' ra''.

Dane, ba thug' li'' va'' , tha'' lhag' va'' ga'' ra'' yo, su byumyu'' jham tao'' lai lo'' thao re , nyhao: nhae qho' wa tao; nae'' khyid' zhaung: qho: phyaug' ru maboe'' shao: thaug' qhao'' to: gelang: se o''. Khyid, zhaung: wa khag' re khag' yao; yao'' gaung yao: joe'' ra'' jo,qo , ang: ra'' mau'' zo'' mae seim'' nyhang'' nae'' re mho nug ra'' ngaid.

ni'' naung'' ra'',

myu''jhid'zolau: