Lhao tung'' ce' ba nug ra'' ba nug ra'' , nug mae'' m-je: li'' lo i''?

Jhid'de ra'' Lhao nau'' bam we'',

Yhamsang: byu myu'' re d-qu'' ngaid ge, lhe''

Nao d-yaug ra'' Lhaovo byumyu'' adao mae qu'' ra'' myo, myao wa Lhaovo alhap' mo, qhid' mae

gyai yao: yau: gying ru ngaid.

Nao Lhaovo re jhid' yang thaug' qhao lao'' Lhaovo byumyu'' qi:qhang lo nae'' m-myao'' lo

Ai we' d-khyo: za nao Lhaovo ngaid mung: Lhaovo re qu'' ngai: na re wa Lhaovo byumyu'' qi; qhang khyo mae thao gyo'' na va'' tho' je; thao gyo'' lo'' nae'' ga'' ru myid theim m-shaid' ngaid nava''.

Pe'' mung caru: qo'' ta'' ga'' re, Nao Lhao nau'' Lhao myen'' maba , Lhaovo sam''ve, tung'' ce' re m-mho'' m-xeim, pe'' dao'' m-ngae lao'' wa Lhaovo byumyu'' qi: qhang nae'' myid nghae'' na maca'' lo nae''. Lhaovo byumyu'' qi qhang khyo wa nao yao'' qi; qhang khyo va'' ga'' ru beim; se lhe'' .

Lhao tung'' ce' ba nug ra'' ba nug ra'' ga ta'' za ta'' na ra'', Lhaovo ngaid' mung: Lhao tung'' maba re m-gai ga nao ta'' na ra'' , Lhaovo we' qhug' lao'' Lhao myen'' maba yang: Lhaovo ein ta'' nae'' m-vae'' lhaung'' boe'' ra''. (caru: the' myid ru wa Mo''so ke' to byid' ra'' akao'' va'')

Ngaid yang: re Lhao tung'' ce' ba nae'' qhid' mae nao ai qhi'' qam; m-ke' , ma thaug' qhao , Lhao myen'' jhau nae'' qhid' mae re: nao khyo m-qho , ta'' lao'' wa Lhaovo bam m-laug , Lhaovo suna thao gyo''ra'' ga ....

Jhid' de, ra'' nga'' mao nga'' nhaung we'' khayaug' Lhaovo re pe'' ta'' ta'' , khaqhi'' qu'' ngai ngaid mase'' , Nao d-yaug thaug' qhao na ru ngaid re wa Lhaovo ga'' ru mug' myid mae m-byaug lo'' , je; qi qhang lo nae'' wa Mo''so mung dao: we' d-khyo'' yao; ngaid nava'' wo''. ( Mo''so wa Abraham d-yaug mae'' byumyu'' aja;ja , mug' mae'' kyi ru: , pang: lai mae'' ma sho ru; je'' myo'' li'' nhao yaug ngaid ra'' ga'' ru myid beim qam: yu gelang lhe'').

Beim: Se Lhao Nau''

Nao Lhao Nau'' Ngaid Ru Beim: Se Lhe''

Ni'' Pho'' Mang Pe'' Ga''? Nao Khag' Nau''?

Nao Khavo , Khadam Mae'' Ga'' Ru Beim'' Na Wa, Lhe''..

Ni'' Ra'' Byu Myu'' Re Nao Daqu'' Ngai Lhe''

Gai Magai Ngaid Yang: Re Lhaovo Khyo'' Mae'' Mug'myid Mae Li'' Geig' Va'' Ra''

Nao Na: Ra'' Jo,qo Mae Ni'' Ra'' Byu Myu'' Qhid' Mae Aung: Gu Thaug' Qhao Nae'' Wa

Nao Ngo Lhao Nau'' Bam Alhap' Ra'' Qo Ngaid Va'' Ra''.

Byu Myu'' Khao: Ngo'' Qi: Qhang Gau Mana: Li''

Tung''ce' Sam''ve, Re: Yaung'' Gau Gai Gau Jap Byang'' Gau Qo'' Ko'' Ru Ma-ngaid:

Qi: Qhang Na Va'' Byu Myu'' Jham Wa Yao; Bam Ra'' Phug' Phyid' Thaug' Qhao Byid Co' Va''

Nhyao'' Phug' Phyid' Lhaovo Jham Laba Lajhao Akhyo Mae Myo, Mabung'' Yang:

Thao Gyo'' Na; Ru Re Myid Beim: Mung:

Thao Phyao: Na Li'' Nae'' Lhao Nau'' Jham Su Agaung: Mae Myo, Khung: Ma-ngai Veshao:

Nao Ngo Ana'' Ba Ra'' Lhao Nau'' Thaug Qhao Ca'' Va'' Lhe''.

Beim: Se , Gyang: Se Lhao Nau'' Qi We''..

2011 ra'' Lhao nau''

Ngaui bau'' ra'' zin sag' 2011 re tug' yu ra''

Jhid'e, ra'' Lhao nau'' mao; qi nhaung: qi we'',

nhyao; nhae qho' bam ra'' suna azhao'' myao nae'' tau thaug' qhao nae'' ra''

zin sag' d-zin dam; joe'' lo va'' ra'' lhe''

2011 re Computer re nyang'' ba; ci sho' ga'' ra'' Lhao nau''

2011 re taung bug myen'' d-ja; ja re qo'' ba sho' thaug' qhao nae'' ra'' Lhao nau''

2011 re Mo; do ba: khang'' sho' ga'' ra'' Lhao nau''

2011 re Lhao tung'' ce' qo'' ba sho' ga'' ra'' Lhao nau''

2011 re Lhaovo byu myu'' qi qhang nae'' qhid' mae'' ngaui kye' khyo'' aung; gu qo'' thaug' bao'' ra'' Lhao nau'' boe'' sho' ga'' ra'' khyo aja: ja mae d-ja; ja re qo'' boe'' sho' qo'' thaug' qhao ra'' mao; qi nhaung: qi boe'' ru we'

nhyao; mo' ra'' suna re tau: to' au'' suge mhyae nae'' tau xo' yang thaug' qhao na bam gelang: o''.

Tho' pho'' Mo''so wa nhyao; nhae qho' re m-qu'' na nae''

man yao; bao'' yu nae'' ngaid.