southall school of languages and missionaries orienataion

Ana'' ne, wa London mae phung'' to'' ra'' jaung d-lam a-khyo re ta'' kyo nug ra'' , c-ra'' jaung wa sasana mau'' zo'' re qam; ke' ra'' pa'' caung phung (Southall Baptist Church) mae'' mung qi; qhang lo; na ra'' jaung ngad ra''. Ana'' au; re wa English classes, Desciple Training , Bachelor and Master levels bam re gai; do, ra'' ga'' ru re ta'' kyo ke' ra'' o''.

Jaung a-khyo je; ba nug lhao'' http://www.sslmo.co.uk/ mae gai; vu'' ra'' , a-na'' au wa mang jab mae'' jaung nau'' bam do' na ko'' ra'' e.g Brazil, Korea, India, Pakistan, Kenya, Peru, Myanmar we' Europe mae'' jaung nau'' bam gyai laug li'' va'' ra'' .

A-na'' ba: ra'' So Ju-i ( Theology)

Jhid' de, ra'' lhao nau'' bam a-lab re ta'' nug , tsao khyo'' nug ra'' khyo myo; myo jo, ru mae'' a-na'' myi wa So Ju-i ( Theology) we' ting'' ra'' a-khyo d-jhid' ta'' nug ra''. Nhyao: mo' ra'' L-lam l-khug khyo wa gyai nau'' nae'' shi'' ga'' ru re nao ngo lhao nau'' a-lab mo, ba gau ngad n-va'' ein lam'' ra''.

pe'' mung ga'' re L-lam l-khug ga'' ru wa d-ne, d-ba za: re ga'' va'' , ba va'' , laug va'' ga'' ra'' ja; m-ngad yang ngad ra''. Yao: wa ne, khao; ne, ngo'' ra'' su-na , kao daui khyo ngad ra''. Ai tho' mae So Ju-i ga'' ru wa ban we' ban boe'' doe, lo; ra'' m-myid bam a-lab' we' tha'' lag' na ra'' mung kan khyo a-ja; ja dao mae nyhang'' yu ca'' ra'' khyo myo; myo jo, ga'' ru re beim g-lang.

Lai lo ra'' m-myid mae'' Patristic - pa'' caung we' ting'' ra'' khyo myo; phyao re pho'' qi mae'' au; she ra'' yo, Mediaval- a gaung; yo, we' mung Reformation- lai lo ra'' ayo, ra'' khyo re tha'' lag' ra'' yo, we' mung a-ana'' nao ngo na; na ra'' Post Modern ga'' ra'' jhaung phaung yham wa khai mae re gai; ngad ra'' ga'' ra'' ban mae joe'' na bam va'' ru ngad.

C-ra'' a-sang Yesu thao cao'' ra'' naung cao bam ra'' su-na a-ja; ja lai phyid' lo va'' ru mae'' nyhao: mo' Lhaovo bam wa 19th Century lo'' thao'' tam'' re she' so ra'' naung cao bam boe'' lo ru ngad ra'' ein vo'' myao ra''. C-ra'' a-yo, re li'' vo'' ze; ru re gyai gai ra'' ngad ra'' , pe'' mung ga'' re yham sang myig ra'' o; ra'' khyo re m-gyaug m-qho' , m-gaung yug taung'' gai ta'' , gai cao'' ye'' ra'' a-yo, ngad yang ngad ra''.

yau; gying ru wa nhyao; nae qho' bam c-ra'' a-khyo re d-gu; ba mung vo'' cao'' ye'' lo'' nae'' ru ngad ra'', ai wa yham sang myeng'' thoe, tung'' ce' , sam'' ve, we' l-lam l-khug khyo pe'' re qi; qhang sho' kha-qhi'' kha-kyo'' mae'' thaug' qhao na va'' ga'' ru mae vu'' yang joe'' lo nae'' d-xe zing ra'' Lhaovo byu-myu'' re vo'' byu myao nae'' ngad ra'' ein ...ta' au'' c-ra'' tung'' khye' re to; shi va''ra''.

vo'' gyo'' ra'' mungkan lau dao: d-qhae:

USA mae ngaui yham (bank) bam ngaui m-vo'' byaug' zai'' boe'' mung gyai qug' na ko'' ra'' , ai re American Asuya bao'' yu nae'' qhid' mae Mang; up jhaung George W. Bush wa $700 billions thug byid' nae'' ga'' ru re Congress ga'' ra'' mang: up phung: byu qi: bam myig m-vang'' boe'' na ko'' ra'' ga''.

Thailand mang: mae joe'' na ra'' myen mang byu'' bam myen mang: Asuya' re San da' pya' ko'' ga'', a-nag' ra'' bung gyi bam Yangon khyo mo'' khai mae San da' pya' , d-beik' maug' ru re dam myig beim'' ru we' myen mang: Asu''ya' tha'' nae'' qhid' mae mo' yao: na ko'' ra'' ga'' ru re BBC lau dao: mae vo'' gyo'' ra''.

L-ha mang: mae z-shao bam shaug' nae'' n-nug' phoi: shaug' re vae; dug' no , vao sheim sheim ru we' gaung dau: m-pyo: boe'' yang L-ha Asu''ya' mae'' n-nug' phoi m-aung: nao lo ga'' . Ai ra'' lau wa Hong kong khyo joe'' sho' joe'' na va'' ga'' ru re the' gyo'' ra''.

qi; qhang khyo qho g-lang

Lhaovo bam m-gai: yab jo, lo , ba myao: lo'' va'' , thao gyo'' lo'' na ra'' ,l-lam l-khug , tung'' ce' phaji: khyo , byu na byu ye, khyo , cid khyo ya khyo , xo' taui khyo , zaui; zo; mung ve, khyo , nghaui'' pyo khyo , mang; khyo gye khyo , phaga khyo khyo aja; ja mae thao gyo'' na ru mae'' su-g-je we' yao; cao yao: vo'' zam'' na ye'' lo'' nae'' qhid' mae thaug' qhao g-lang o''..

d-yaug d-lo ceim'' zaui mung loe, beim qi; qhang ye'' lo'' g-lang o''...

Yham d-jhid' yhaung'' to'' ra'' lhe''

Tung'' ce' sam'' we, blog yham a-sam d-jhid' tha'' to'' ra'' , ai mung nghaui'' thoe re: gai gyo nae'' qhid' mae thaug' qhao: to'' ra'', vo'' vo'' za gyo; vu'' g-lang , lhao nau'' qo ga'' ru ngad ra''.

Lhaovo bam re Mo''so min gam byid na shao: aw''

Khai Khyo Au: Qhu; Ra''? Where Are We Headed?

Lhaovo bam , lhao nau'' jham ra'' ne, mo'' ba, khai khyo au: qang na; ga'' ru re myig vu'' ca''.
Ana: ne, mungkan wa 21st Century , Information Techonology Age ga: yang qi: qhang jo, na va'' .
Ca-ra'' a pyad qid lao mae kao daui: na ra'' Ve, qae'', nag' bo Lhao nau'' Lhao zo bam kha kyo'' , kha-ru thaug' qhao na: ga'' ru mae cao'' yang , joe'' lo nae'' ngo: zin , d-xe zin ra'' Lhaovo byu myu'' re l-myhung'' gai myao ra''.

Yham sang myeng'' thoe re m-jhau , m-ta'' , m-mung , yham sang sam'' ve, re phug' m-te' , m-ci , tung'' ce' khyo m-thaug' qhao ngad re wa Lhaovo byu myu'' byaug lo'' nae'' wa pe'' ta'' m-ca'' ngad n-va''. Ce-re beim'' yang yham sang myeng'' thoe, yham sang tung'' ce' , yham sang sam'' ve, ga: yang za lam'' kad' na lao'' re mung kan I T khyo we' Media Communication ga'' ra'' xo' taui khyo , phaji'' khyo thao gyo'' nae'' re myig ca'' nae'' ngad ra''.

Ai mung ngo d-yaug' khyo'' myig vu'' re wa Lhaovo bam wa su ga-je tho' je: thaug' qhao ca'' nae'' ngad ein vo'' myao ra''. Vo mau'' zaui: mung yham mau'' qham'' , yham mau'' zaui: mung vo mau'' m-vo'' kad' m-boe'' nae'' qhid mae d-yaug we' d-yaug ba: gyo'' ru we' myig vang'' , myig qham taung'' ceim'' thaug' qhao na bam gai ra'' ein the' beim'' ru re tsao kyo'' ke' ra'' aw''.

Mo''so min gam je:ju ayo, khao ngo'' vo'' ra'' mo, boe'' doe' na v-shao: aw''.

University of Cambridge

UK, England mang: mae Second Top Tsao'' myao jaung mo'' ngad ra'', ca-ra'' jaung khyo vo'' li'' do, nae'' qhid' mae wa IELTS ga'' ra'' English tung'' ce' re phyid' poe'' vao mung lo'' dig 6.5 vo'' ca'' ra''. D-zin ra'' jaung do, phug' ein nae'' wa £25000 we' £30000 ngad ra'' ga'' ru re vo'' ba ra''. Lhaovo bam c-ra'' jaung khyo thao phyao m-joe'' nae'' ein kha-yaug' m-vo'' ta'' mhao''..

Mo''so khyo phung'' byid' lo; ra'' ba re wa thaug' qhao nae'' wa nhyao nae'' qho' ra'' mau'' zo'' yao: ngad' a-va'' ra'' o''..

big bang ga'' ra'' ru pe''?

Lhao nau'' bam m-thao gyo'' na nae'' qhid' mae ngo ba: ra'' kyo''mae'' ta'' kyo nug ra''.

Big Bang ga'' ru wa mung kan we' Gug' mang boe'' lo: ra'' a-khyo a-qao re Phajhi'' ju:-i phug' bam ta'' ra'' a-khyo myo; myo mae'' d-ja ngad ra''. Ai wa zai mo'' shid' lam shid' shad' khyo'' yao; cao yao: au: thaung qhug' mung go; byi lo'' ru mae'' ba , kyi , lho'' we' mug' myid dao kao'' bam a-lab' bo: ra'' Gug' mang (Universe) boe'' lo ru ngad' ga'' ga'' ra'' khyo ngad ra''.

Ana: ca ra'' a-khyo ngad laug? m-ngad laug ga'' ru je: ba sho' Ju:i pho'' bam wa France we' Switzerland mang: kyo mae'' CERN ga'' ra'' jo, no mae'' xam; jao mae mau''zo: a-sag' phung'' qhid' na: a-ko'' ga''.

kha ru boe'' nae'' ga'' ra'' khyo re wa m-vo'' ta'' shi , lao'' vu'' zai za ngad ra'' ga'' o''.

http://www.simsamyit.blogspot.com

ce re lhao nau'' d-yaug ra'' blog ngad ra'' ye lhe'' vu'' g-lang.

American Mang: Jhaung Up ( President) ra'' Rung''

WHITE HOUSE ga: re khai ra'' , ai mung Capitol Buling , Oval Office ga: re mhang'' a-ko'',

WASHINTON D.C mae jo, ra''.

American Mang: Jhaung Up khying poe''

American mang: mae joe'' lo nae'' November byid ba: ba re Mang: Jhaung Up khying poe'' ( President Election) ngad zai ngad.

Ai ra'' qhid' mae Mang: masa phung shid' phung mae'' Jhaung Up tug'( Presidency Candidate) shid' yaug : Barack Obama ( Democratic Party Nominee) we' Jhon Mac Cain (Repuplican Party) wa d-yaug we' d-yaug qam: ke' yao: jho'' ta'' lam'' na a-ko''.

Khayaug' Jhaung Up boe'' nae'' ga'' ru wa joe'' lo nae'' Nov byid ba: ne, re she ba zai ngad ra'' o''.

Tho' Mo''so mae myig nghae'' jao: jo, ra''.

Jhid' de, ra'' lhao nau'' bam alab' e''.... ana'' ban ra'' nyhao mo' su-na myig ke' vu'' re , nyhao mo' lhaovo byu myu'' jham a-khyo aja; ja mae thao gyo'' na shi'' ru re the' myao yang nag' m-pyo ngad' kyi: tung'' ce' we' sam'' ve, , pha,ji'' ju-yi , ngaui'' ja: , l-lam l-khug , byu na byu ye, , ga: yang shad' khao; ngo'' mae'' qam m-qo'' boe'' na ga'' ru re vo'' myao; ra''.

Ngag m-se'' Tho' Mo''so ra'' mung dao: mae ta'' to'' ru we' d-khyo'' za Yao; re lam khug' ru we' thaug' qhao myig nghae'' ra'' mo' alab' re yao; min gam nae'' , nag' lam ngaui pyo'', yaug yo, myeng cae'' ra'' je:ju byid nae'' ga'' ru re m-to'' myig' g-lang.

Lhaovo byu myu'' qi; qhang lo nae'' wa Mo''so we' za a-gai boe'' lo nae'', English khyo'' wa : ''Nothing is impossible with God '' nyhao mo' lhaovo bam re: Mo''so we' ngad lao'' wa gai boe'' shi'' ein qam byid' ru we' qam lhao'' ra'' o''.. Lhaovo bam re Mo''so min byid' na shao.....