Aug' Bam Jham; Jung Gyo'' Poe

Ana'' zin; ra'' nyao mho' Lhaovo Qid Nyab' Phung , Jham; mho'' Jung ra''' Jung gyo'' poe re joe'' lo nae'' March khye' lho'' xeing ngo'' ba qan'' re kaid' nae'' ngaid ga'' ru qo'' ba ra''. Mug' va mae joe'' na ko'' ra'' Lhao nau'' mao; nhaung bam alhab' re: khe' mhyae ngaid re wa Jung nau'' bam we' d-ga'' za ngaui bau'' ra'' ba na re Mo''so jeju re caung khin'' nae'' qhid' mae lau kyo'' ke' qo'' ra'' o''.

M-mhyao'' ra'' ayo, re Lhao phung: phung'' qhid' ra'' shid' xe zin byang'' jeju caung khin'' ra'' yo, gin; mo'' re re; qo'' kaid' nae'' tau thaug' qhao na ra'' ga'' ru qo'' ba ra''.
Lhao nau'' bam alhab' yham sang; ra'' byu myu'' qi; qhang khyo mae aung: ra'' gu'' mae'' thaug' qhao na g-lang: ein qam; lao au'' zhao kyo'' ke' ra''.

Aug' Bam

USA Mang: Jhaung Up Xug' Cliton we' George W. Bush For Haiti

North America mae'' mang: nau'' zo Haiti wa lai; lo'' va'' Ban thug' shid' ba; ba 12.01.10 re myig lab mo'' lab mung vo-mo'' gyoe, gyo'' ru we' byu taung yo'' myo; sho' shid' thao'' va''. Ai ra'' jo, qo khyo abao'' athaug' byid' ko'' ra'' mang: myo; myo mae'' USA wa gye zo: d-xe taung we' ngaui qhang zo: shaug' bao'' thaug' ko'' ra''. Ai mae'' ana'' ne, za; Qhid' phyao: re'' Presidents George W. Bush we' Cliton wa ana'' ra'' President Obama'' we' d-ga'' za Haiti mang; byu qi qhid' mae'' abao'' athaug' qo'' nae'' qhid' mae American mang: byu bam alhap jhao'' bao'' yao nae'' qhid' mae pyang dao; ta'' ko'' ra''.

Ngo ye zaung co' ra'' yham we' ngo we' d-ga'' zo zo'' lai va'' mho, ana'' wa pha lug bam boe'' na; bam ra'' ga Mr. Cliton ta'' ra'' . Ai we' d-khyo; za Mr. Bush re: Laura we' ngo Haiti mang: mae'' lau dao: re qu'' gyo; mung nhag' go, myid zao'' ra'' qu'' nhag' khyag' ra'' ga ta'' ra''. Haiti mang; byu bam wa gyai yao; nhag' lam; gang'' ra'' byu bam ngaid ra'' ga; re ta'' ra'' , ana'' c-ra'' Myig lab yang: qug' khai'' ru mae'' dam: qo'' gai; lo lao'' USA wa nga nhaung'' ra'' ba nam gai ngaid ra'' ga myid beim'' na qo'' nae'' tau thaug' qhao g-lang ga yao'' ra'' mang: byu bam re zhao'' kyo ru re qo'' gyo'' ke' ru ngaid.

Lhao nau'' d-yaug ra'' khyo

Lhao nau'' d-yaug ngaid m-se'' yham sang: ra'' myan'' thoe khyo'' Phan'' A-sang re caung'' nghaui'' nae'' re kao shid' xe je lao'' she' khyo myao yang; , lai lo va'' yo, qhid' mae'' gyai yao; myid m-pyo; ngaid kyi:. Ngaid yang: re thao m-gyo'' shi'' au re yham sang; ra'' myan'' thoe khyo'' Mo''so re qo'' caung khin'' nae'' khyo myao yang Asang re gyai yao: jeju so'' kyi:.

Nhag' khug mae'' yug thug' li'' ra'' caung'' nghaui'' thoe re nga'' ra'' aung nhag' myan'' thoe khyo'' qo'' caung khin'' ru gyai ngaui bau'' ra'' o''. Lai lo ra'' yo, mae'' ngo re'' ru ana'' joe'' sho' yham sang: myan'' thoe khyo'' Mo''so re m-qo'' caung nghaui'' shi'' ra'' Lhao mao: nhaung bam gyai laug shi'' ra'', ai bam qhid' mae'' re; Mo''so yao; nhaung'' re nhag' lam kham phung'' ru we' khyo myao: lo g-shao: o''.

Jhid' de, ra'' Lhao mao: nhaung bam alhab' re qam: lao nug ra'' , Lhaovo ngaid mung Lhao myan'' qam nhang'', m-ba: byaug ra'' mao; nhaung bam we' , myan'' thoe ba ngaid m-se'' yham sang: myan'' thoe khyo'' Mo''so re caung khin'' nae'' jeju m-qo'' shi'' ra'' Lhaovo mao; nhaung bam alhab' qhid' mae'' jhaung: mho' bao'' ru we' aung ra'' gu'' mae'' jho'' bao'' jho'' thaug' na g-lang o''.

D-yaug we' d-yaug qo bo , myo, de re m-qu'' lo: A-sang ra'' myo, nho re tau'' qu'' mung Lhaovo bam alhab' dang qhan'' ru we' yham sang: myan'' thoe khyo'' Gyoe so a-sang re qo'' caung khin'' mung Mo''so ra'' ngaui bau'' lau dao: hau'' kyo'' khyo we' Sosuna akhyo mae qo'' thaug' qhao ye'' lo'' ra'' byu myu'' , Mo''so mae d-ba; d-ba qi'' qhang lo ra'' byu myu'' min qo'' ra'' byu myu'' boe'' doe, ye'' lo'' g-lang lhe''.

Zin Xe Lam: Momyid

2000 zin re World Trade Centre dao: lha shid' ce' yang bom paug' mhya pye' ru qhug' va''.

2007 zin September re Yangon mae myen bunggyi bam re be se' be, pyo ru qhug' va''.

2008 May khye' re Myen mang: mae Aug' La mo'' qhug' mung byu d-tin je: shid' gao: va''.

2010 re wa mung kan mae mhyao thao'' ra'' yham mo'' re Dubai'' mae qo'' phung'' qhid' ke' v-ko''.

Taung zo: byu myu'' Lhao nau'' bam ra'' xe zin adai: ado, mae qo'' kaid' aung myaug ra'' mau'' zo'' bam re ba; ra'' mho, je ju'' we' xo' taui'' lo g-la ein mho, yao nug ra''.

2010 Franciscan Min Dao:

Dang man'' ra'' jhid' kao khyo we' kao ba: daui nae'' qhid' mae Mo''so wa nao re laui laui za pe'' re pe'' dao'' m-ngae: ra'' myid, ngaid m-ngaid' ra'' khyo jham: we' a-dao: pyae zam'' khug khyo pe'' re nhag' m-shid ra'' min jhaung: byid v-shao:

Dau nyang'' ra'' khyo we' loe, biem yaug yo, ra'' khyo re qo'' thaug qhao nae'' qhid' mae Mo''so wa nao re m-tara'' , zag zo'' ra'' , loi'' zo'' ra'' khyo re ba lao'' nhag' mai'' ra'' min jhaung: byid v-shao:

Nhag' kaug' myid m-pyo: bao: re nhag' khyag' bao'' thaug' yu mung yao: nhaung'' ra'' qug' khai khyo re ngaui bau'' khyo boe'' doe, nae'' qhid' mae Mo''so wa nao re qug' khai kyi'' khyag' , no phyo: qhug' , sha-pye'- gin kho' ra'' jham, moe, shap' phau: ru we' gye qo aja: ja qhug' mo, qhid' mae'' thug' gyo'' nae'' ngug byid min jhaung: byid v-shao; o''.

Dang man'' ra'' khyo , nhag' khyag' ra'' khyo zo-shao bam we' qug' khai myaung sho'' ra'' mao: nhaung: bam alhab' jhao'' joe'' nae'' qhid' mae Mo''so wa nao re ba gau qo'' go: ra'' nhag' myid min jhaung byid yang su myo: myo m-qo'' kaid' ra'' mau'' zo'' bam re qo'' thaug' qhao ye'' lo'' v-shao: o''..

Engage ga'' ra''Baptist Mission Society, Magazin'' mae'' re Southall Baptist Church program mae tung'' to'' ru re gai boe'' gu dao: phaug' ru ngaid.

Aug' Bam Jham Mho'' Jung

Mo''so ra'' je''ju khug mae nyhao: mho' Lhaovo bam: ra'' L-lam L-khug Kao-so' Aug' bam jham mho'' jung re Mo''so byid' to'' m-thao sao qhid' mae Asang je''ju re caung khin'' ra''.

Aug' bam jham jung nau'' bam 2009 zin ra'' sosuna gyaung khyo re sam phung: gae mung qo'' thug' du va'' ga'' ru re qo'' ba ra''. 2009 Deceber qan'' mae'' mung Myidkyina: vo-mang: , Ciphaui vo-mang: we' Vai''mo vo-mang: khyo'' mhyi'' pho'' mao: nhaung bam jhao'' qo'' joe'' va'' ru ngaid.

Mo''so we' Byu-myu'' myo, khung: re tau'' qu'' mung Jung nau'' bam re lham; tug' yu ru we' jo, qo seim'' nhyang'' byid' ra'' vo-mang: khao: ngo'' mae'' Lhaovo pa'' caung phung we' phung byu Lhaovo bam alhab' re Aug Bam Jham Jung ra'' gaung tha'' je''ju so'' ra'' ein nug ru ngaid. Xo' yang wa Pho'' a-sang ra'' Min jhaung: xe wa jhid' de, ra'' mhyi'' pho'' mao: nhaung bam alhab' adao: mae jo, na shao: ein jhaung mho' ke' ra''.

Lhaovo ra'' su-na qi: qhang nae'' wa nao ngo Lhao nau'' ra'' qo yao ngaid a-va'' o''.

Aug' Bam Z-lau:

2009 thao'' 2010 joe'' Lhaovo bam ra'' ayo, joe'' va'' ra''

Ana'' ba wa 2010 ra'' sao qhid' blog tung'' ru ngaid, 2009 zin re ngaui bau: taung'' qo'' lai ru we' d-khyo'' 2010 re re: ngaui bau taung'' qo'' na ye'' lo'' nae'' ein lam'' ra''.

2009 re mungkan mae boe'' doe, lai ra'' a khyo bam d-jhid' re mhyae: ra'' gu ta'' lang ga: lao'' American mang: mae sao qhid' lhang ra'' Sh-no' Dammada' boe'' lo va'', ai thao re mung kan mae qi'' thao'' ra'' ngaui qhang qug' khai khyo( Global Recession and Economics Crisis) qhug' bam va''.

Mungkan mae mang qi'' dig ra'' nghaui'' sang Micheal Jackson ( King of Pop) re: shid' pye' va'', myen mang: mae'' au jhaung boe'' lo nae'' Mhyi'' zang re re Asuya' bam nhao yo, joe'' ru m-nhao byid' ru tho' xo' yang taung'' to'' ru re qhug' va''.

Lhaovo bam qhid' mae'' 2009 zin wa kha-kyo'' kha qhi'' ngaid laug? Lhaovo kha mhyo'' yaug tan'' xe aung mung: , kha mhyo'' yaug phaji'' maug qo'' zhaung'' yu va''? Taung bug mang: khyo phaji'' ngaui qhang qho nae'' tau kha mhyo'' yaug re dai'' ke' qo'' va''? Tung'' ce' sam'' ve, khyo mae kha kyo'' mae'' qo'' thaug' qhao va' ga'' ra'' ru pe'' re no, no, nag' nag' myid qu'' ca'' va''. 2010 re re m-beim m-lau'' na: pye' nae'' i''?

Zin sag' wa nyhao: nhae qho' ra'' lo, khug mae joe'' na va'', ai re kharu: ci ye'' lo'' nae'' wa nao ngo yaug nge, khag' re khag' ba; ci ra'' mae cao'' yang l-se'' bo: nae'' ngaid. Lhao nau'' bam alhab' joe'' ra'' jo, qo mae Mo''so qhid' , byu myu'' qhid' wa yham sang ra'' mhyi'' pho'' mao; nhaung ba nam ba zo: qi alhab' qhid' mae'' yaung'' lho'' su-na boe'' doe, sho' thaug' qhao na g-lang o'' .

Mo''so Lhaovo qi re min byid na va'', d-yaug we' d-yaug qo khyad', bao'' thaug', dang qhan'' jhid' de, myid re qhid' to: mung, Jeju caung khin'' ra'' myid we' khae: yu na g-lang lhe''

Lhao jhid' z-lau:

Aug' Bam

Happy New Year

Asang ra'' zin na 2009 wa lai lo'' na va'', 2010 ein ra'' zin sag' re khae yu nae'' jin'' jin'' ngaid va'' i''? 2010 wa zin xe lam: d-lam: dam; qhid' ra'' zin ngaid ra'' , c-ra'' zin sag' we' zin xe lam: sag' re tug' yu nae'' tau nhag' lam , myid seim'' nhyang'' gau ngaid nae'' ein lam'' ra''.

Asang mae'' min jhaung: qo'' khae: yu ra'' Lhao nau'' zo: dau qi boe'' doe, nae''tau yaug nge, thaug qhao na g-lang o''.

Good bye 2009

Welcome 2010

Have a Super Successful New Year!!

Merry X'mas Lhaovo

Jhid' de, ra'' Lhao nau'' bam alhab' mo, re ngaui bau'' ra'' A-sang: khau ba ( Merry X'mas) ein lo zaui'' ke' ra'' aw'' . Mungkan mang: jab sho' na: bam ra'' Taung zo: bam re: yao'' mang: we' yao jeju caung'' khin'' ru we' X'mas poe bam re kaid' ko'' ga'' ru lau dao: Radio mae qo'' gyo'' ra''. Ai mae qo'' gyo'' ke' ru wa New Zealand mang: mae wa Lhao lau: de, pho'' Lagang Dau: Khao jui'' au she mung Philippines mang: Manila mae wa Lhao mhyi'' nau'' Khao Zhai'' jui'' au she na ko'' ra'' ga'' ru qo'' gyo'' ra''. Ana'' ru Lhaovo bab yham sang na: ra'' joe'' ra'' jo, qo mae Mo''so re beim'' ru we' jeju caung: khin'' ra'' phaung re bao'' thaug' qo'' ru re Lhao nau'' d-yaug khyo'' mae'' nga: ye, ra''.

ngaid yang re myid qu'' nae'' jao d-lam kam'' wa ai shid' yaug wa Lhao khyo'' m-jhau m-ta'' ko'' ngaid ra'', yao: tao: Lhao khyo'' m-ta'' yang qo myao; ra'' khyo'' ta'' ru m-ngaid lo: , nhyao Lhaovo bam re Lhao myen'' Lhao thoe' khyo'' mea Asang re jeju qo'' caung khin'' re we' yham sang ra'' nhag' te' myen'' khyo'' ngaui bau: taung'' X'mas poe re qo'' kaid' ye'' lo'' shao; ein jhaung mho' ra''. Thao gyo'' ngai na shi'' ra'' yham sang Lhaovo bam re m-to; co' lo bao'' yu thaug' yu g-lang ein qam lao'' ke' ra'' aw''.

Taung zo: bam joe'' na ra'' mang: bam wa USA, Germany, Netherlands, Denmark, Norway, UK, Singapore, Malaysia, Japan , Thai, Philippine we' La-ha mang: bam ngaid ra'' ga'' ru qo'' ba ra''. C-gu mae Lhaovo akhyo myid bo thaug' qhao na ru m-bo shi: ein ta'' re m-shaid' nae''. Ba ga'' va'' Lhao nau'' bam e'' beim'' gyang g-lang se ..

Lhaovo Myo, Jap Qham Phaung ( Lhaovo Conference)

Ana'' au ra'' mang: khyo , phaji'' ju-i khyo , zaui: zo mung ve, khyo , l-lam l-khug we' byu myu'' qi: qhang: ye'' lo'' nae'' khyo mae nao ngo lhao nau'' bam kharu: myid nghae'' thaug' qhao ye'' lo'' nae'' ga'' ru a-qao: bo taung'' myid qu'' gai ra'' o''.

Su byu myu'' bam qi: qhang: ra'' khyo re qu'' mung nhag' ngai: na: m-gai lo:, mug' myid dao mae Lhaovo ein li'' geig' ru wa Lhaovo khyo'' kao daui ca'' va'' ru ngaid ra''. Ngaid m-se'' Lhaovo wa Mo''so phan'' ra'' xao-su byu myu'' myo'' myo mae'' Lhao myen'' mung: ra'' lhaovo bam ngaid ga'' ru myid beim'' qo'' ra''. American, L-ha , G-la we' g-tau byu myu'' bam wa yao: nhaung'' ra'' byu myu'' qhid' mae'' ga g-tau m-myid ngaid m-se'' byu myo'' ra'' m-thao yao: nhaung'' kaid' ra'' mau'' zo'' a-lhab' wa yao'' bam ra'' byu myu'' qhid' mae'' bo gau ngaid va''. C-ra'' byu myu'' bam lao'' khag' re khag' ra'' byu myu'' we' mang: qi: qhang khyo mae thaug' qhao na ko'' ru re qo'' ba ra''.

Myen mang: khug mae'' byu myu'' bam ra'' a-khyo re dam: myid ke' qu'' re nyhao mo' lhaovo bam wa qi: qhang: ban bung'' khyo mae thao'' gyo'' na ra'' ein re m-shaid' nae'', ngaid m-se'' qi: qhang: lo; na ra'' ga'' ru re the' myao yang: ngaui bau'' ra''. Myen, l-sae'', l-ha , g-la , mun , R-khai: , khang'' , ka' yin: , ka'yah'', kachins we' g-tau: byu myu'' m-laug shi'' ra'' bam d-yo je jo, shi'' ga'' ru re laung'' mho'' qu'' va''.

Nyhao mho' lhaovo bam yham sang: ra'' byu myu'' qi: qhang khyo thaug' qhao ye'' lo'' ru mae qug qae'' khyo gai: boe'' ra'' gu'' mae'' yeim'' sho' , gang'' tang ra'' khyo'' mae'' qi: qhang ye'' lo'' nae'' qhid' mae akao'' bo taung'' ba; myid au: she ye'' lo'' g-lang o''.

Kharu: kha-khyo'' dang qhan myid qhug' taung'' zaui'' so'' ye'' lo'' nae'' ga'' ru re Lhaovo mhyi'' pho'' mao: nhaung , mho'' mhyi'' mho'' pho'' , zug' ade bam alhab' leim'' ra'' Lhaovo myo, jap phaung (Lhaovo Conference) d-lam: phyaid deig ra'' khyo'' qo'' kaid' boe'' nae'' ca'' ra'' ein qo'' myao ra''.

Mung dao:

Asang yesu' khau li'' ra'' au re ba: thug' shaid' mae'' phaji'' ba mo, joe'' li'' yang li'' pa'' caung ko'' ga''.

Yao nhaung'' re wa phaji'' ba mo, ngaid mung Mo''so wa phaji'' khyo'' mung kyi mo'' re qhu'' mung khyo shid' ru re qo'' ba ra''. Ngaid yang: re phaji'' ba mo, wa yao; nhaung'' dao'' ngae ra'' khyo'' khyaid' yu a-sang , Jhaung zug re Jhaung zug vang'' mae ye qho ako''. Yao zaung'' mo, re wa kyi qhu'' ngaid m-se'' pe'' m-ba g-nae'' ga Mo''so wa mug' l-gyo: bam re nhao'' ke' mung ngaui bau'' lau dao: ta'' nhao ra''. Ana'' ba Davi' ra'' vo mae khyaid' khyi: yu a-sang khau va'' ga'' mug' l-gyo bam ta'' ra'' dao: re yao zaung'' mo, qo'' gyo mung d-lhang: dae v0 khug khyo lo'' mung Asang re qo'' pa'' caung ako''.

Asang khau thao myao: ra'' byu shid' yaug mae'' d-yaug wa khanae'' re jham: mug sug' nghae' yang na: ra'' khyad' yu a-sang re myid nghae'' na ra'' Shi' maung ga mang: ra'' yaug ngaid. Pa'' caung yham mae jham ba pho'' khin jaung bam myo: myo na ngaid m-se'' myid nghae'' ru we' lao'' na ra'' yaug za: A-sang re qo'' myao ra''. Ai mung dam: d-yaug wa pa'' caung yham khyo khanae'' re ngaui bau taung'' li'' ra'' cug' mo'' myhi'' A-na ga: ru ngaid. Yao wa nhaid' zin za yham thau: qo'' mung cug' mo'' mo'' yang m-sho: m-jhing su; yang lhoi'' ru, goe qu'' ru qhug' ngaid m-se'' myid m-thao'' lo Mo''so re myid nghae'' ru we' pa'' caung yham mae pyo'' ra'' yaug ngaid.

Asang re qhug' thao kao daui ban tha'' lhag' byuag ra'' akhyo re dam; qu'' qu'' g-lang:. Phaji'' ba mo, wa yao nhaung'' ra'' ban mae phug' de, thao'' ra'' jhaung qhu'' re byid ako''. Yao zaung'' mo, wa phaji'' ba mo, ru: ngaui qhang jhaung qhu'' m-qo'' ngaid m-se'' yao: nhaung'' qo'' gyo'' ra'' khyaid' yu a-sang akhyo re ngaui bau: taung'' hau'' kyo'' ako''ga'' ru qo'' myao ra''. Pa'' caung yham mae'' Shu' maung wa '' A-sang we'' ni'' ra'' byu myu'' re khyaid' yu nae'' khyi; yu a-sang re zo: dau ra'' myo, yang qo'' myao va'' mung shid pyo: va'' ga'' ta'' ra'' ''. Cug' mo'' myhi'' wa A-sang re myao lao'' je''ju caung khin'' ra'' ga'' ru re qo'' ba ra''.

Nyhao: nhae qho' ra'' kao daui ban re dam; myid qu'' mung c-ra'' December a-sang khau li'' ra'' ayo, mae a-sang re g-gai: za qhug' va'' i''? ga'' ru yham sang gaung yham sang myid qu'' mung A-sang re khae yu qo'' ra'' zo: dau boe'' ye'' lo'' g-lang . Asang ye-su' re qhug' ra'' yaug wa kao re qo'' ra'', a-sang re m-qo'' yaug wa kao re m-qo'' ga'' ra'' jham: dao: yang qam byid' ke' ra'' o''.

Tho' mae'' mung dao: re Australia mang: Myanmar Baptist Church ra'' Yao zaung'' phung up vo London joe'' ra'' au ta'' ra'' mung dao: mae'' beim'' gu re dam: gae: kyo'' ru ngaid.

Byu d-yaug ra'' ban

Xu-su byu d-yaug boe'' li'' va'' ga: lhao'' wa o mae'' boe'' khyo re qhug' mo, jhaid' ngaid ra''.

Ayo,(Time) , Qam: o: (Energy) , Ngaui Qhang (Money) ce sam ja: wa byu d-yaug ra'' ban mae'' d-lhang dae qo'' yu nae'' gyai qug' ra''. ngai shi'' au: wa Ayo, qo'' Qam: o: qo'' ngaid m-se'' ngaui m-qo'' yang nhag' ngai, myid m-pyo: boe'' nae''. Ve, Qae'' au: wa mau'' zaui ngaui qo'', qam: o: qo'' ngaid m-se'' Ayo, m-qo'' boe'' mung nhag' m-pyo: boe'' nae''. Kao laug mung pyo: pyo: na nae'' yo, re ngaid lao'' wa Ayo, qo'', ngaui qo'' ngaid m-se'' Qam: o: m-qo'' byaug boe'' ra'' byu-na ban re ba: myid lhang: yu mung yham sang ra'' kao daui ban Mo''so nhag' dag ra'' zo: dau boe'' sho' ein ra'' myid we' kao daui ngaid re wa c-ra'' ban za m-ngaid shid ra'' thao; ban qhid' mae'' re ngaui bau'' je''ju re qo'' yu nae'' ga'' lhe''.

Mungkan Bo:lung'' Poe'' Mo''

Joe'' lo nae'' 2010 June khye' re Africa Mug, South Africa mang: mae kaid' nae'' mungkan bo:lung'' poe'' mo''( Fifa world cup 2010) mae kha mang: wa kha mang: we' qhug' pag' nae'' ga'' ru re ana'' myi December 4, 2009 re South Africa mang: mae Le, Zao''( Draw) kaid' yang gae: ke' va'' ru ngaid.

Phung (Group) 8 phung, d-phung mae mang: byid mang: , alhab' re mang: 32 mang: ngaid ra''.

Phung:

A.

1. South Africa

2. Mexico

3. Uruguay

4. France

B.

1. Argentina

2. Nigeria

3. South Korea

4.Greece

C.

1. England

2. United State of America (USA)

3. Algeria

4. Slovenia

D.

1. Germany

2. Australia

3. Serbia

4. Ghana

E.

1. Netherlands

2. Denmark

3. Japan

4. Cameroon

F.

1. Italy

2. Paraguay

3. New Zealand

4. Slovakia

G.

1. Brazil

2. North Korea

3. Ivory Coast

4. Portugal

H.

1. Spain

2. Switzerland

3. Honduras

4. Chile

LHAOVO BLOG MAE'' TUG' YU; RA'': Zin Yo Lam: Shid' Xe Da Ra'' Lhao Nau'' Qo

LHAOVO BLOG MAE'' TUG' YU; RA'': Zin Yo Lam: Shid' Xe Da Ra'' Lhao Nau'' Qo

Zin Yo Lam: Shid' Xe Da Ra'' Lhao Nau'' Qo

Zin Yo Lam: Shid' Xe Da:

Ing''lig' Shophyu: khyo'' wa 21st Century ga:

Lai lo'' va'' zin yo re dam; myid ke' qu'',

Lhaovo ga'' ru kha tau: mae shi''?

Yap mo'' mo'' yang na to'' ru

Lhaovo bam yao: ngaid va'' ru

Khag' yang re: m-nhug' ,

Nhug' yaug' re m-thug'

D-taung gug yo; byid xe khyaug' ,

Shophyu: Sara: yao: za kyaug' kyaug'

Ai thao: d-taung gug yo; ngo'' xe shid' ,

Lhaovo bam beim'' li'' d-jhid' jhid'

Ngaid yang Mo''so khyo phung'' byid ,

D-taung: gug yo nhad' xe byid

Lhao tung'' ga'' ru qo'' yu va'' ,

Mho''pho'' Luka Hhao'' Leim'' kaid' ru ga''

D-taung gug yo; gug xe gug

Je''ju caung'' nae'' a-khyo: thug

Lhao tung'' ce' kao shid' xe ngo''

Go'' lai va'' mhao'' Zam mo'' mhao''

Jhaung yham zam go'' vang''

Lhaovo bam jhad' gyang'' gyang''

Go'' ra'' lhe'' nhaing'' ra'' lhe''

A-sang je''ju caung: khin'' ra'' lhe''

Shid' taung shid' xe byid zin lam:

Lhao tung'' ngo'' xe zin byang dam:

Joe'' lo na ra'' Lhao nau'' e''

Lhao tung'' re re: a zhao'' myhao nhao se lhe''

2024 Lhaovo tung'' ce' for all

Welcome Lhaovo Literature Golden Jubilee

God Bless Lhaovo and Lhaovo Literature

KIA gye-dap a-qao:

First Dec, 09 (Sweet December) Ana'' myi'' thao 05:00pm mae'' 7:00pm joe'' sho' University of London, School of Oriental & African Studies building mae Taung zo: byumyu'' bam alhab' qhid' mae'' loe, beim khyo au: she' jui'' ra'' KIA ra'' a-qao: boe'' doe, lo a-khyo re ta'' kyang'', byin zhao'' kyo'' ra'' ru (presentation) re Dr. Mandy Sadan ga'' ra'' mho'' mhyi'' ta'' ru re y-qo'' b-gyo'' ru ngaid.

Yao; wa Taung zo: a-khyo re Research kaid' mung Master Degree we' Ph.D Degree maug' re qo'' zhaung'' yu to'' ru ngaid ga'' ru re qo'' ba ra''. Myen mang: ra'' Byumyu'' a-ngai bam pe'' mung Asu''ya' re myi-am lag nag, vo, mung to lan ye'' (Revolution) kaid' qhid ko'' i''? 1. Inglik Asu''ya' yang sa: kho' up khang'' yang i''? 2. Myen Asu''ya' mae'' myen mang: d-mang'' geim'' re Buddist State kaid' nae'' ngaid ga ta'' yang i''? G-gai; yao: Taung'' zo: bam up-khang'' ra'' Taung Mang: State ( Union of Kachins) boe'' nug' yang i''? Pe'' mung yang myi-am vo, ra'' gye-dap phung'' boe'' lo ru ? ga'' ra'' dao: myid (Questions) bam re no, no, myid qu'' nae'' qhid' mae ta'' zhao'' kyo'' ru ngaid. Yao; ta'' ru wa KIA boe'' lo; ra'' a-qao; wa byu myo; sho' d-lhang dae ro ro ga; mung myid qhug' taung'' boe'' lo ru wa m-ngaid' lo qug' qae'' khyo myo: myo mae'' thaug' qhao lo ru ngaid ga'' ru re ta'' ra''.

1959 qan'' mae'' lau dao: m-qo'' jho'' xo' kyo'' ra'' m-thao (Information Gap) Inglik bam ra'' gye-dap mae mau'' vin qu'' ra'' gye-zo: ve, qae'' nhae qho' mae'' jhui'' qhid' lo; ru ngaid ga; ta'' ra''. Ai ra'' au re Taung mang: mae'' Wungyi'' Sama Duwa Sinwa Nawng wa myen khyo b-de, mung yham sang: byumyu'' bam o-ngaui: ra'' khyo re myid m-vao: zo: lo yao'' ra'' Zug' Ar Na je; gang'' tang sho' thaug' qhao ru we' ve, qae'' bam re jo, qo m-byid mung boe'' qhid' lo; ra'' khyo'' ngaid ga; ta'' ra''.

c-ra'' a-khyo re myid ke' lao'' nyao: mho' Lhaovo bam ra'' jo,qo wa khakhyi'' kha tau mae ngaid nae'' laug ein qo'' myid ra''. Lhaovo we' Taungzo gye-dap KIA kharu: xo' taui khyo jo, laug( connection) re myid qu'' ca'' nae'' ngaid. Phaug' mao; nhaung bam jui'' au'' ra'' mae myid qhan taung'' b-thaug' qhao lai lo ko'' laug? m-ngaid re wa Lhaovo bam myid m-leim'' ko'' laug? kha-khyi'' kha-kyo'' ngaid nae'' ga'' ru pe'' re ba; to'' re wa gai nae'' ngaid ein qo'' myid ra''.

Nyhao: mho' byumyu'' ra'' Political , Social, Education, Economics and Business re kha-khyo'' kharu kaid' myid ye'' lo'' mung khyo phung'' thaug' qhao ye'' lo'' ca'' ru re myid qu'' nae'' thug' ra'' ein qo'' myid ra''. D-jhid' qo'' gyo'' ru wa NDAK wa Lacid' L-lhao ra'' gye-dap ngaid' ga'' ru wa kha-kyo'' kharu; byumyu'' qi; qhang'' khyo wa ja nam jab ca'' ru re myid beim'' zo''ngaid o'' .

Union of Myanmar re b-bao'' nae'' i''? Federal State re b-bao'' nae'' i''? Lhaovo Land ein yang: na nae'' i''? myid qu'' ca'' va''. Lhao myeng'' mung ra'' gye-dap phung'' ca nae'' i''? gye-dap m-phung'' lo mang; byu qam; khyo'' thaug' qhao nae'' i''? L-lam l-khug phung mau'' zo'' khyo'' thaug' qhao nae'' i''? Phaji'' ju-i: ngaui qhang qam: o aja ja gang'' tang ra'' byumyu'' boe'' nae'' qhid' mae byumyu'' m-laug ngaid m-se'' a-kao'' bo bo thaug' qhao ye'' lo'' re wa gai boe'' nae'' ein lam'' ra''.

the' tae'' gyo'' ke' ra'' nghaui'' thoe

Qhid' phyao cug' mo'' ma: d-ma: na ko'' ga'' , d-ne, yao; ma we' yham kyo: bam nga-kung'' ye: ko'' ga''. Yao: mhyi'' m-yaung'' yang cug' mo'' nau'' wa yao: qo'' kung'' ra'' ngo: bam re byin cao'' yao; mhyi'' re byid' ra'' ga''. Myi'' thao yham lo'' mung myi'' xeim zo: yo, re , cug' mo'' nau'' wa yao; ngo kung'' ke' byid' ra'' yham khyo ye'' lo'' ra'' , ai re kham lham myid' pye' ru the' qhug' ga'' .

Yham khyo myid m-pyo'' dig ru dam; tug' lo re yao; mhyi'' wa yao'' qhid' mae'' ga qo'' ra'' ngo nau'' re d-gu: za nhyang'' to byid' ru re lo'' myao lao'' m-tho' ta'' l-sho' ngaui bau'' ru we' , nhag' khug mae re; m-tho' ta'' l-sho' naung myid qo'' byaug ga''. Ai thao mae'' wa yao; ma ngaui bau taung'' na; ye'' lo'' v-ko'' ga''.

C-ra'' mo-myid, wa yham sang byu myu'' re qu'' ngai, athang ngai ra'' byu re ta'' kyang'' ta'' peim'' ra'' khyo ngaid ga'' ru the' ba ra'' , su byumyu'' re a thang qi: mung su qhid' mae'' b-bao'' b-thaug' ngaid m-se'' lo'' thao'' ne, re wa su; yang to; co' ru qhug' nae'' ga'' ru ngaid.

Jhid' de, ra'' Lhao nau'' mao: nhaung bam a-lhab' c-ra'' m-myid' mae'' cug' mo'' nau'' ru naung myid m-qo'' nae'' qhid' mae yham sang: ra'' byumyu'' qi qhang khyo mae aung: ra'' gu'' mae'' thaug' qhao na g-lang o''.

Lhaovo Novel

Y-pho'' mang wa Zao'' bug' Zaung' Khao we' Y-mhyi'' wa Jeim phaug' Leim'' Nyoe ngaid. Yao; wa lhaovo byu myu'' a-khyo mae gyai yao; thaug qhao nug ra'' ga; lhaung'' ta'' yaug ngaid. Ai: yaug wa Sae'' mang; Bam Sam Xe vo mae'' Zao'' bug' nau'' Khao Qhu; ngaid. Yao; wa Lhaovo a-khyo gyai yao; myid leim'' ngaid m-se'' yao'' ra'' na; qi'' lo; ra'' jo, qo wa mao; nhaung phaug' vo , za; vo , la-cid' vo bam we' myo; myo; zam'' ca'' mung Lhao myeng'' we' Lhao tung'' ce' pe'' re nyang'' m-vo'' mung , nghe' byaug ru re yao; gyai yao; ba; gyo'' ru we' thaug' qhao na yaug ngaid.

Yao; mae y-mao; sam yaug we' y-bai; shid' yaug , ai mung y-nhaung yaug gai zo d-yaug nae qho' a-lhab' nhaid' yaug' ngaid a-ko''. Yham mae qug' khai yang y-mao; y-bai; bam wa jung phaji'' re a-zhao'' mhyao sho' m-vo'' mho'' yu ko'' ngaid ra'' . A-ngai ngaid' ra'' Khao Qhu; wa y-mao; y-bai'' bam ra'' jeju yang tain'' xe re vo'' phyid aung va'' . Ai mung ana'' y-mhyi'' y-pho'' we' mao; qi bai; qi alhab' mo, boe'' nhao nug ra'' Mo''so mau'' zo'' vin vo, yaug boe'' lo nae'' qhid' mae Yangon v-mo'' mae'' jham jung mo'' mae jham ju-i re mo'' xeim'' yu na ra'' . Yangon v-mo'' mae Taung mang; shaid' mae'' Lhao nau'' bam myo; myo joe'' na ko'' re Khao Qhu' d-yaug gyai yao; qam vo'' na; ra''.

Qhe'' byin cao; e'' nao Lhao nau'' ru mung ra'' Lhaovo m-ngaid la? ngo wa Sae'' mang; Bam Sam Xe vo mae'' Zao'' bug' nau'' Khao Qhu; ngaid' nao wa pe'' nau'' , pe'' mang ga'' ru ngaid? Aw ngo i'' ? ngo wa Taung mang; Vai'' Mo vo-gaung mae'' L-nga; nau'' Khao Nain'' ngaid , -ra'' jham jung mae BTh lo'' thao'' zin mae'' jham; ju-i re mho'' xeim yu; na ru ngaid. Ana'' ru jho'' qhug' ru mo''so jeju yao; va'' , gyai ngaui bau va'' lhe'' . Ai re khoru; ein dau zai? ta' shi la mhao'' .. ngo wa sae'' mang; mae byin cao; byu myu'' bam we' d-lag' lag na ca'' yang nyao; Lhaovo ra'' bang'' se'' khyo re m-taung'' ba ngaid kyi , nga'' uk bam wa Taung mang; mae'' ngaid ra'' ru wa je; ba nae'' ein lam'' ra'' , khoru jho'' dau zai ta'' kyo'' yu la aw''. E'' nga'' bai re m-taung'' ba aw'' , ai Lhaovo sam'' ve, phung khyo myid' ke' zai ngaid' kyi ra'' . Ana'' au wa Lhaovo yao; cao y-bai; y-nhaung; nae qho' khyo'' shi'' dau va''rua i''?

Gai to'' ra'' ,. ai lao'' a-bai ein nae'' lhe'' . Je; gyo'' yo'' nae'' khyo'' Bai; Le, ein nae'' aw lhe'' . Ha ha.. gai to'' ra'' nga'' nhaung e''.. nga'' nhaung yo'' khyo'' khai wa mha lhe'' Bai; Le, tau; zai ngaid ra'' .

xo' shi nae'' .....

Jhaung Qhu'' Ajet (Real Rewards)

Nhag' lam nhyam khyo'' ra'' mo, wa nga; lho'' ko'' ra'', khoru mung ga'' re Mo''so mang: din'' wa yao nhaung'' re'' ngaid ra''. (Mathe' 5:3)


Lai; lo ra'' au re ngo Mathe' 5:3-12 mae bo; ra'' ngaui bau'' akhyo jham; dao re Yesu mae'' mung yang byuna m-yaung'' bao; re myid pyo; shao; ga ta'' mug' ru ngaid' ein laung'' ba; gyo'' ru. Kharu mung ga'' re nao mae ngaui qhang dai kham m-vo'', qao'' zin'' khyo re qam nang'', ni'' myo, wa ngug byid we' byang'' jo, ra'' , ngaid m-se'' nao ngaui bau nae'' qhid' mae dao; khyo d-jhid' ta'' zhao nug ra''.

Lai; lo'' va'' Byu Jhaung Zug' ban re Jhaung zug bam mang; byu bam re ngaui ding''ga'' pye' khyo'' byid ru we' kam'' m-dau ngaid yang; re , Yesu wa yao'' thao cao'' ra'' mo, re Jhaung Qhu'' Ajet nhyum'' na ra''. Mug' khaung mang; ding'' (Heaven) mae'' gyo'' li'' yaug ngaid mung; mug' myid dao kao'' mae thaug'' qhug' ra'' qug' khai khyo bam wa Mug' khaung mang ding'' mae ngaui bau'' ru we' ka'' ke' lao'' pe'' m-ta'' laug ga'' ru re ba ra''.

Ana'' ba Christan myo: myo wa Asang we' qhug' nae'' lo'' thao'' ba ra'' jhaung qhu'' a jet re phug' te' nae'' to'' mhyid' to'' na a-ko''. Nga'' ra'' Yao zaung'' phung: up ( Bill Leslie) c-ru; ga laung'' ta''
(Phung; jham je; ngaui vo'' lo mung aung myaug lo lao'' phung; byu bam wa ' ce-ra'' myid gye wa nga'' ra'' yham m-ngaid , ngo wa myid gye mae'' lai lo'' nae'' yaug ngaid ga'' ru re m-lam'' nug nghaui'' lo boe'' lo a-ko'' ; ce-wa nga'' pho'' ra''mug' gaung ngaid ga; ba; nghaui'' lo; a-ko''.)

Nhyao; khayaug' va lo'' thao'' ne, ra'' jhaung qhu'' a jet( m-shid kao/eternal life) re pe'' dao'' m-ngae ba; qhaid' kaid' nae'' m-ngaid i''?. Zag zo; lhoi'' zo qhug' American Jeim pho''( Slave) ra'' nghaui'' thoe re tae'' gyo mung nhyao'' ra'' lam khug myid re gang'' tang nhao g-lang aw''. ( Ngo re yham mang; li'' jhui'' ra'' yaung'' lho'' myao lo e'' Lam'' nhai'' ra'' mhao''.) Nga'' ra' qug' khai kyi'' khyag' re A-sang mae'' lai yang khag' re m-ba byid.

C-ra'' akhyo re vo'' the' ba ru mae'' wa Asang Yesu' byid nae'' ga'' nho: Jhaung Qhu'' Ajet re phug' je;ba te' ru we' lao'' myid nghae'' ra'' aw''. ( Philip Yancey)

Asang qhid' mae'' qhug' ra'' Qug' khai kyi'' khyag' wa yaung'' lho'' au; zhaung maug (Jhaung Qhu'' Ajet) vo'' yu nae'' qhid' mae ngaid aw''.

Lhaovo people

Lhaovo bam; ra'' suna a-khyo??

Byu qam; kha-mhyo''? Tung'' ce' a-zhao'' kha-mhyo''? Phaji'' a-zhao''? Zaui; zo mung ve, khyo kha-kyo''? L-lam L-khug khyo? Qi;qhang lo'' nae'' kha-mhyao'' lao'' ca'' nae'' ?

Lhaovo bam; qi;qhang lo sho' khag' kaid' byid nae''? Ana'' ba Lhaovo bam; qhid' mae'' g-gai; za mau'' zaui'' na bao kha-myo'' ko na; ra''?

Tho' mae'' ra'' dao; myid(questions) bam re Lhaovo yaug nge, phyi(answer) vu'' mung vo'' ra'' a-phyi(Result) dao mae Lhaovo byu myu'' bam ra'' qhid' suna(Future Lhaovo Living) re l-mhyung'' vo'' myao zai ngaid ra'' ein the' myao; ra'' o''....