lo'' thao'' au'' thoe

Kao 47 zin shi'' ngaid ra'' Mho'' mhyi'' Professor Randy Pausch wa Cancel no mo'' qo'' ga'' ru ba yang: khamhyao'' m-ngaid' re shid zai va'' ga'' ru ba thao re yao'' ra'' mau'' zaui cao; jham, byin cao; jham we' jung nau'' jham re lo'' thao'' au'' thoe ta'' nae'' qhid' mae Ba maug' Jung (university) khyo joe'' li'' va''. Computer Science Professor ( jag au; naug) mho'' mhyi'' wa alhap' re byu 150 ko ngaid nae'' ga thang: na ru ,g-gai re wa zaung khau'' 400 je jo, ra'' qae, do, mo'' lhao'' jhe' byaug sho' ngaid' byaug ra''.

Mho''mhyi'' na; yi d-gaung ko yao'' ra'' nhag' khug' gyo'' dao; kheim jham re qi nug sam su we' qi nug tu'' au'' gyai; yao; l-se'' no, ra'' myid mae zao'' ra'' au'' thoe jham re ta'' ke' va''. Da la-ban gyaro; mae ai ra'' au'' thoe re be, to'' ra'' s-lho daui (video) wa Internet ( mug' xo' taui) mae byu tig khying'' qu'' ru re qo'' gyo va''. Ai thao aung; yaung'' thao'' tung'' paug' boe'' li'' va''. Shid' nae'' re qhug' n-va'' mho, wa kao daui su-na khyo ra'' yau gying ru re gyang'' gyang'' za the' myao ko'' ra''.

Jham; Paug' mae'' Naungcao Po''lu' ra'' au'' thoe re; asang; ra'' nhaungcao mao; nhaung: jham laug, laug, re zin lam; yo myo; myo qam pyang'' byid' lai lo va''. (" nga'' ra'' lo'' thao'' yo, joe'' va'' ra'' '') Po''lu' tung'' co' ra'' ('' ngo wa gai; ra'' akhyo tau gye-se' se' va'', ngo wa bin; zang joe'' sho' tao; va'' , ngo wa lam khug myid re gang'' tang nhao va'' ''.) Timo''thi' re tung'' ra'' tung'' khye' wa nhyao; nhaung'' re re; ta'' peim'' na ra''. Ai tung'' khye' wa asang; ra'' phug' m-byid, ra'' jeju we' qhid, mung: ai ra'' jeju we' thao'' ra'' ga''. A-gaung; gyaro; mae wa jeju caung'' au'' asang ra'' m-thao'' m-bin dao; ce, dao; thang'' jham re ngaui bau nae'' qhid' mae ngaid ra''.

Shid n-va'' za'' yaug ra'' au'' thoe wa kao daui ye'' lo'' nae'' mo, re akao'' bo l-se'' bo; ra'' khyo boe'' doe, nhao; ra''. Po''lu' ra'' lo'' thao'' au'' thoe wa Asang Mo''so ra'' phung'' qap bao d-pyad d-to bao kyi yaung'' lho'' jo, veshao: o'' ga'' ru ngaid ra''.

Nhyao nhaung'' wa m-byo, m-baui; ra'' kao daui khyo mae kao daui; na bam i''?

Ma-ngaid' re wa byo, baui'' pye' nae'' ra'' akhyo mae su'' na i''?

Mug' myid byu jham caung'' nae'' re thaug' qhao na; bam i''?

Ma-ngaid' re wa Asang Ye;su' ra'' ('' ngaid va'' o'') " ga'' ru re d-ne, qo'' khae yu nae'' ga'' ru re myid nghae'' na i''?

Nyhao nhaung'' wa shid' nae'' re re ngaid lao'' wa kao daui nae'' re: jin'' jin'' ngaid n-va''.

Tao'' Khyin Poe

Myid Gye, mang: alhab' mae'' byu bam Spiridon Louis re m-ba ngaid yang: re Greece mang: byu bam alhab' wa yao; re ba ko'' ra''. Pe'' mung ga'' re 1896 zin re Athens mae Olympics d-lhang dam; kaid' boe'' yang ngaid ra''.

Ai zin ra'' khying poe re Greeks byu myu'' bam laug laug aung myaug ko'' ra'', mang; jham alhab' mae'' Qhang D-zig jhaung qhu'' myo'' thao'' qo'' ko''. Ngaid yang: re Greeks byu myu'' alhab' re nga; qo'' nhao; ra'' ru wa Tao'' khyin poe ngaid ra''. 17 zo: wa 24.8 miles re tao'' khyin ko'' ru mae'' Spiridon Louis Aso: d-lam: qo'' nhaung: , yao; wa nao ngo we' d-khyo; za mau'' zaui zo: yaug' za ngaid. Louis ra'' aung myaug' khyo qhid' mae'' mang: byu bam alhab' we' Jhaung Zug, mae'' myhao; to' ru re qhug' va'' ra''. Ai mae'' Louis wa Greece mang: ra'' Tau; qu'' pho''(Hero) boe'' li'' va''.

L-gyo; pho'' Po''lu, re: Khristan: kao daui khyo re tao'' khying poe we' dao ka'' ka'' to'' ra''. D-lang: ra'' Ko''ring thu phung: byu bam re dai'' ra'' tung'' paug' Abang: 9 a-xag' 24 mae nyhao nhaung'' alhab' re tao'' khying poe re b-tao'' mug' ru za; m-ngaid' lo , jhaung qhu'' qo'' yu sho' thaug' qhao nae'' re vae'' ca'' ga ta'' kyang'' ra''. " Byu myo; sho' tao'' khying poe re vao ko'' ngaid yang: re d-yaug za: jhaung qhu'' qo'' ra'' ga'' ru ni-nhaung'' m-ba ko'' i''? jhaung qhu'' qo'' nae'' tau tao'' khying poe re vao ge,.'' ga; qam byid' ra''.

Po''lu' wa nhaid' yang za; ta'' ru m-ngaid' l-za: yao'' ra'' kao daui ban yang'' re daui; qhu'' co' va'' ra''. Yao'' ra'' lo'' thao'' tung'' paug' mae yao; ta'' ru wa: '' ngo wa gai; ra'' gye-se' poe re se' va'' ra'', ngo wa tao'' khying poe re tao'' peim'' mung lam khug myid re zhang: to va''( 2 Timo''thi' 4:7).

Po''lu' wa yao'' ra'' tao'' khyo re tao'' peim'' mung Mug' khaung mang: ding'' ra''' Jhaung zug Mo''so ra'' jhaung qhu'' re qo'' yu va'' ra''. Po'' lu' ru: ni'' ra'' myid gye, ra'' tao'' poe re tao'' khying au'' ni'' ra'' A-sang re ngaui bau: nhao qo'' ra'' o''.

Khristan kao daui khyo wa d-zab za; tao: yang bin ra'' tao'' khying poe ru m-ngaid ,

Marathon ru qhang qhang tao'' ra'' tao'' khying poe ru; ngaid ra'' o''.