Third time to London

Mo''so jeju mae London vo-mo'' khyo a-so: sam lhang ein nae'' dam; joe'' li'' va'' ru ngaid.
Mug sug' tung'' yaug Nyhao; mo' ra'' co' phyid' mug Taung Mang: we' Sae'' Mang: Yangon Mandale'' qan'' lho'' shid' khye' ko lo'' qo'' na; qin'' ru ngaid.

Jhid' de, ra'' Lhao nau'' mao; nhaung bam e'' nyhao mo' ra'' su-na a-zhao'' mhyao; lo nae'' qhid' mae gyai yao; a-thaug' qhao'' na ge-lang lhe''. Nao ngo lhao nau'' khai: mae joe'' na ngaid m-se'' yham sang: ra'' byu-myu'' re m-vu'' ngai lo; jhui'' qi; qhang ye'' lo'' nae'' tau aung; ra'' gu'' mae'' thaug' qhao ye'' lo'' gai; ra'' o''.

Vai''mo Lhaovo Qid Nyhap' Phung: Jhaung Qham, Lhao Tung'' Ce' We' Sam'' Ve, Phung: , Lhaovo Jham: Mho'' Jung we' Lhaovo khyo'' Mo''so re Pa'' Caung'' ra'' Phung: jham a-lhap mho, myid qhan; dang qhan; taung'' lo, xo' mung: Mo''so mau'' zo'' , byu myu'' mo'' zo'' mae nhag' qhan thaug' qhao'' ye'' lo'' re m-myhao'' ra'' ayo, mae nyhao mho' ra'' su-na azhao'' bin; ru bu'' yaung'' mhyao; gae: ru mhyao ye'' lo'' n-va'' o''.

Singapore

Singapore ga'' ra'' mang: wa mang: byu alhab' 4.99 million tin 50 ko za; ngaid ra''. Myo; phyao wa l-ha bam ngaid a ko'', Malay, Tamil we' g-tau byu myu'' bam qhan'' na ko'' ra'' mang: sag' ngaid ga'' ru qo'' ba ra''. 1965 re English Empire mae'' Independent qo'' mung Republic of Singapore ga; yang mang: sag' boe'' lo ru ngaid ga''.

Malaysia mang: we' qid' dae sang nae'' khyo we' mang; khyo mae myo myo dao; myo'' na; ru mae'' gai boe'' sho' thaug' qhao to'' ko'' ra''. Asia gu'' mae'' za wa Tokyo we' Osaka bin lao'' a so; sam ein nae'' na zo; phug' phug' deig ra'' City State ngaid ga''. Jak mau'' pe'' we' Technology, ai mung Pang Lai qid dae we' tin'' ra'' phaga khyo mae qi; qhang ra'' mang; nau'' ngaid ra''.

Singapore Airline wa A300-800 ga'' ra'' Dao; Lha mo'' re myo, myo qo'' vai mung myid gye, mae'' mang; mo'' bam myo; myo khyo ye; ye lo lo byu dai'' ra'' phaga mo'' yao qo'' ako'' ngaid ra''.

Glocal Ban: Joe'' Lhaovo

Ana'' ra'' byu na ban re Mobile Generation ga; mhang'' a ko''. Globalization mae'' Glocal ga'' ra'' khyo joe'' lo na; ra''. Mobile Generation ga'' ru wa byu na bang; d-bang; we' d-bang: m-dau lo; ayo, khao; ngo'' mae tha'' lag' mung a-sag' a-sag' ra'' myo, myao we' boe'' na ru re ta'' ru ngaid.

Ai mung dam; d-lam; Glocal ga'' ru wa Global, myid gye, ga''' ra'' dao; ce' we' Local ga'' ra'' yham; sang; vo tham: re qhan'' to'' ra'' dao; kheim sag' ngaid ra''. Pe'' mung ga'' re ta sag' mae wa myid gye, ra'' ba vao shaid' mae'' mang: USA, UK & Europe mae boe'' ra'' khyo re Japan, Korea we' Asian mang: bam jhao'' laui d-lhang dae cao'' boe'' ru we' g-tau Brazil we' South America, South Africa ru African mang: bam jhao'' re d-khyo; za ngaid na va''.

C-ra'' ta re kao daui: na ra'' nyhao mho' Lhaovo bam ta'' sag' ra'' kao daui khyo re kha kyo'' ko mae cao'' mhyae na ra'' ga'' ru re myid qu'' gai ra'' o''. Myid qu'' mung qam; yu mung thaug' qhao ye'' lo'' nae'' re myid nghae'' ra''. Myid qu'' mung m-gai boe'' lo-nae'' ga'' ra'' myid we' myid kham; pyip' mung yab jo, m-gai lo o''.

Lhao nau'' Nao d-yaug thaug' qhao'' ru wa Lhaovo bam ra'' qi; qhang khyo mae m-shid cid' ngaid lhe''.

Bamsamxe

ေလာ္ေဝၚ ဆိုသူမ်ား အတြက္

ခ်စ္ေသာေလာ္ေဝၚမ်ား အားလုံး ေနေကာင္း က်န္းမာၾကပါေစေၾကာင္း
ပဏာမ အားၿဖင့္ ဦးစြာ ဆုေတာင္းေမတၱာ ပုိ.သအပ္ပါသည္။

ကၽႊန္ေနာ္မ်ား ေလာ္ေဝၚBlogger မ်ားအေနၿဖင့္မိမိ၏ တန္ဖိုးရွိလွေသာအခ်ိန္ ကုိအသုံးခ်ကာ
ၾကဳိးစား ေရးသား ထားေသာ ေလာ္ေဝၚစာေပမ်ားကုိ အားေပးဖတ္ရွုုဳ ၿခင္းအားၿဖင့္
ေလာ္ေဝၚစာေပတုိးတက္ေရး၌ တဖက္တလွမ္းမွ ပါဝင္ၾကပါရန္ ေလာ္ေဝၚစာေပေရွ.ေရးအက်ဳိး ေမွ်ာ္၍တုိက္တြန္းႏူိးေဆာ္ လုိက္ရပါသည္။

ေလာ္ေဝၚစာခ်စ္သူ
ဝုိင္းေမာ္။

Tao'' Khyin Poe

Myid Gye, mang: alhab' mae'' byu bam Spiridon Louis re m-ba ngaid yang: re Greece mang: byu bam alhab' wa yao; re ba ko'' ra''. Pe'' mung ga'' re 1896 zin re Athens mae Olympics d-lhang dam; kaid' boe'' yang ngaid ra''.

Ai zin ra'' khying poe re Greeks byu myu'' bam laug laug aung myaug ko'' ra'', mang; jham alhab' mae'' Qhang D-zig jhaung qhu'' myo'' thao'' qo'' ko''. Ngaid yang: re Greeks byu myu'' alhab' re nga; qo'' nhao; ra'' ru wa Tao'' khyin poe ngaid ra''. 17 zo: wa 24.8 miles re tao'' khyin ko'' ru mae'' Spiridon Louis Aso: d-lam: qo'' nhaung: , yao; wa nao ngo we' d-khyo; za mau'' zaui zo: yaug' za ngaid. Louis ra'' aung myaug' khyo qhid' mae'' mang: byu bam alhab' we' Jhaung Zug, mae'' myhao; to' ru re qhug' va'' ra''. Ai mae'' Louis wa Greece mang: ra'' Tau; qu'' pho''(Hero) boe'' li'' va''.

L-gyo; pho'' Po''lu, re: Khristan: kao daui khyo re tao'' khying poe we' dao ka'' ka'' to'' ra''. D-lang: ra'' Ko''ring thu phung: byu bam re dai'' ra'' tung'' paug' Abang: 9 a-xag' 24 mae nyhao nhaung'' alhab' re tao'' khying poe re b-tao'' mug' ru za; m-ngaid' lo , jhaung qhu'' qo'' yu sho' thaug' qhao nae'' re vae'' ca'' ga ta'' kyang'' ra''. " Byu myo; sho' tao'' khying poe re vao ko'' ngaid yang: re d-yaug za: jhaung qhu'' qo'' ra'' ga'' ru ni-nhaung'' m-ba ko'' i''? jhaung qhu'' qo'' nae'' tau tao'' khying poe re vao ge,.'' ga; qam byid' ra''.

Po''lu' wa nhaid' yang za; ta'' ru m-ngaid' l-za: yao'' ra'' kao daui ban yang'' re daui; qhu'' co' va'' ra''. Yao'' ra'' lo'' thao'' tung'' paug' mae yao; ta'' ru wa: '' ngo wa gai; ra'' gye-se' poe re se' va'' ra'', ngo wa tao'' khying poe re tao'' peim'' mung lam khug myid re zhang: to va''( 2 Timo''thi' 4:7).

Po''lu' wa yao'' ra'' tao'' khyo re tao'' peim'' mung Mug' khaung mang: ding'' ra''' Jhaung zug Mo''so ra'' jhaung qhu'' re qo'' yu va'' ra''. Po'' lu' ru: ni'' ra'' myid gye, ra'' tao'' poe re tao'' khying au'' ni'' ra'' A-sang re ngaui bau: nhao qo'' ra'' o''.

Khristan kao daui khyo wa d-zab za; tao: yang bin ra'' tao'' khying poe ru m-ngaid ,

Marathon ru qhang qhang tao'' ra'' tao'' khying poe ru; ngaid ra'' o''.

Aug' Bam Jham; Jung Gyo'' Poe

Ana'' zin; ra'' nyao mho' Lhaovo Qid Nyab' Phung , Jham; mho'' Jung ra''' Jung gyo'' poe re joe'' lo nae'' March khye' lho'' xeing ngo'' ba qan'' re kaid' nae'' ngaid ga'' ru qo'' ba ra''. Mug' va mae joe'' na ko'' ra'' Lhao nau'' mao; nhaung bam alhab' re: khe' mhyae ngaid re wa Jung nau'' bam we' d-ga'' za ngaui bau'' ra'' ba na re Mo''so jeju re caung khin'' nae'' qhid' mae lau kyo'' ke' qo'' ra'' o''.

M-mhyao'' ra'' ayo, re Lhao phung: phung'' qhid' ra'' shid' xe zin byang'' jeju caung khin'' ra'' yo, gin; mo'' re re; qo'' kaid' nae'' tau thaug' qhao na ra'' ga'' ru qo'' ba ra''.
Lhao nau'' bam alhab' yham sang; ra'' byu myu'' qi; qhang khyo mae aung: ra'' gu'' mae'' thaug' qhao na g-lang: ein qam; lao au'' zhao kyo'' ke' ra''.

Aug' Bam

USA Mang: Jhaung Up Xug' Cliton we' George W. Bush For Haiti

North America mae'' mang: nau'' zo Haiti wa lai; lo'' va'' Ban thug' shid' ba; ba 12.01.10 re myig lab mo'' lab mung vo-mo'' gyoe, gyo'' ru we' byu taung yo'' myo; sho' shid' thao'' va''. Ai ra'' jo, qo khyo abao'' athaug' byid' ko'' ra'' mang: myo; myo mae'' USA wa gye zo: d-xe taung we' ngaui qhang zo: shaug' bao'' thaug' ko'' ra''. Ai mae'' ana'' ne, za; Qhid' phyao: re'' Presidents George W. Bush we' Cliton wa ana'' ra'' President Obama'' we' d-ga'' za Haiti mang; byu qi qhid' mae'' abao'' athaug' qo'' nae'' qhid' mae American mang: byu bam alhap jhao'' bao'' yao nae'' qhid' mae pyang dao; ta'' ko'' ra''.

Ngo ye zaung co' ra'' yham we' ngo we' d-ga'' zo zo'' lai va'' mho, ana'' wa pha lug bam boe'' na; bam ra'' ga Mr. Cliton ta'' ra'' . Ai we' d-khyo; za Mr. Bush re: Laura we' ngo Haiti mang: mae'' lau dao: re qu'' gyo; mung nhag' go, myid zao'' ra'' qu'' nhag' khyag' ra'' ga ta'' ra''. Haiti mang; byu bam wa gyai yao; nhag' lam; gang'' ra'' byu bam ngaid ra'' ga; re ta'' ra'' , ana'' c-ra'' Myig lab yang: qug' khai'' ru mae'' dam: qo'' gai; lo lao'' USA wa nga nhaung'' ra'' ba nam gai ngaid ra'' ga myid beim'' na qo'' nae'' tau thaug' qhao g-lang ga yao'' ra'' mang: byu bam re zhao'' kyo ru re qo'' gyo'' ke' ru ngaid.

Lhao nau'' d-yaug ra'' khyo

Lhao nau'' d-yaug ngaid m-se'' yham sang: ra'' myan'' thoe khyo'' Phan'' A-sang re caung'' nghaui'' nae'' re kao shid' xe je lao'' she' khyo myao yang; , lai lo va'' yo, qhid' mae'' gyai yao; myid m-pyo; ngaid kyi:. Ngaid yang: re thao m-gyo'' shi'' au re yham sang; ra'' myan'' thoe khyo'' Mo''so re qo'' caung khin'' nae'' khyo myao yang Asang re gyai yao: jeju so'' kyi:.

Nhag' khug mae'' yug thug' li'' ra'' caung'' nghaui'' thoe re nga'' ra'' aung nhag' myan'' thoe khyo'' qo'' caung khin'' ru gyai ngaui bau'' ra'' o''. Lai lo ra'' yo, mae'' ngo re'' ru ana'' joe'' sho' yham sang: myan'' thoe khyo'' Mo''so re m-qo'' caung nghaui'' shi'' ra'' Lhao mao: nhaung bam gyai laug shi'' ra'', ai bam qhid' mae'' re; Mo''so yao; nhaung'' re nhag' lam kham phung'' ru we' khyo myao: lo g-shao: o''.

Jhid' de, ra'' Lhao mao: nhaung bam alhab' re qam: lao nug ra'' , Lhaovo ngaid mung Lhao myan'' qam nhang'', m-ba: byaug ra'' mao; nhaung bam we' , myan'' thoe ba ngaid m-se'' yham sang: myan'' thoe khyo'' Mo''so re caung khin'' nae'' jeju m-qo'' shi'' ra'' Lhaovo mao; nhaung bam alhab' qhid' mae'' jhaung: mho' bao'' ru we' aung ra'' gu'' mae'' jho'' bao'' jho'' thaug' na g-lang o''.

D-yaug we' d-yaug qo bo , myo, de re m-qu'' lo: A-sang ra'' myo, nho re tau'' qu'' mung Lhaovo bam alhab' dang qhan'' ru we' yham sang: myan'' thoe khyo'' Gyoe so a-sang re qo'' caung khin'' mung Mo''so ra'' ngaui bau'' lau dao: hau'' kyo'' khyo we' Sosuna akhyo mae qo'' thaug' qhao ye'' lo'' ra'' byu myu'' , Mo''so mae d-ba; d-ba qi'' qhang lo ra'' byu myu'' min qo'' ra'' byu myu'' boe'' doe, ye'' lo'' g-lang lhe''.

Zin Xe Lam: Momyid

2000 zin re World Trade Centre dao: lha shid' ce' yang bom paug' mhya pye' ru qhug' va''.

2007 zin September re Yangon mae myen bunggyi bam re be se' be, pyo ru qhug' va''.

2008 May khye' re Myen mang: mae Aug' La mo'' qhug' mung byu d-tin je: shid' gao: va''.

2010 re wa mung kan mae mhyao thao'' ra'' yham mo'' re Dubai'' mae qo'' phung'' qhid' ke' v-ko''.

Taung zo: byu myu'' Lhao nau'' bam ra'' xe zin adai: ado, mae qo'' kaid' aung myaug ra'' mau'' zo'' bam re ba; ra'' mho, je ju'' we' xo' taui'' lo g-la ein mho, yao nug ra''.

2010 Franciscan Min Dao:

Dang man'' ra'' jhid' kao khyo we' kao ba: daui nae'' qhid' mae Mo''so wa nao re laui laui za pe'' re pe'' dao'' m-ngae: ra'' myid, ngaid m-ngaid' ra'' khyo jham: we' a-dao: pyae zam'' khug khyo pe'' re nhag' m-shid ra'' min jhaung: byid v-shao:

Dau nyang'' ra'' khyo we' loe, biem yaug yo, ra'' khyo re qo'' thaug qhao nae'' qhid' mae Mo''so wa nao re m-tara'' , zag zo'' ra'' , loi'' zo'' ra'' khyo re ba lao'' nhag' mai'' ra'' min jhaung: byid v-shao:

Nhag' kaug' myid m-pyo: bao: re nhag' khyag' bao'' thaug' yu mung yao: nhaung'' ra'' qug' khai khyo re ngaui bau'' khyo boe'' doe, nae'' qhid' mae Mo''so wa nao re qug' khai kyi'' khyag' , no phyo: qhug' , sha-pye'- gin kho' ra'' jham, moe, shap' phau: ru we' gye qo aja: ja qhug' mo, qhid' mae'' thug' gyo'' nae'' ngug byid min jhaung: byid v-shao; o''.

Dang man'' ra'' khyo , nhag' khyag' ra'' khyo zo-shao bam we' qug' khai myaung sho'' ra'' mao: nhaung: bam alhab' jhao'' joe'' nae'' qhid' mae Mo''so wa nao re ba gau qo'' go: ra'' nhag' myid min jhaung byid yang su myo: myo m-qo'' kaid' ra'' mau'' zo'' bam re qo'' thaug' qhao ye'' lo'' v-shao: o''..

Engage ga'' ra''Baptist Mission Society, Magazin'' mae'' re Southall Baptist Church program mae tung'' to'' ru re gai boe'' gu dao: phaug' ru ngaid.

Aug' Bam Jham Mho'' Jung

Mo''so ra'' je''ju khug mae nyhao: mho' Lhaovo bam: ra'' L-lam L-khug Kao-so' Aug' bam jham mho'' jung re Mo''so byid' to'' m-thao sao qhid' mae Asang je''ju re caung khin'' ra''.

Aug' bam jham jung nau'' bam 2009 zin ra'' sosuna gyaung khyo re sam phung: gae mung qo'' thug' du va'' ga'' ru re qo'' ba ra''. 2009 Deceber qan'' mae'' mung Myidkyina: vo-mang: , Ciphaui vo-mang: we' Vai''mo vo-mang: khyo'' mhyi'' pho'' mao: nhaung bam jhao'' qo'' joe'' va'' ru ngaid.

Mo''so we' Byu-myu'' myo, khung: re tau'' qu'' mung Jung nau'' bam re lham; tug' yu ru we' jo, qo seim'' nhyang'' byid' ra'' vo-mang: khao: ngo'' mae'' Lhaovo pa'' caung phung we' phung byu Lhaovo bam alhab' re Aug Bam Jham Jung ra'' gaung tha'' je''ju so'' ra'' ein nug ru ngaid. Xo' yang wa Pho'' a-sang ra'' Min jhaung: xe wa jhid' de, ra'' mhyi'' pho'' mao: nhaung bam alhab' adao: mae jo, na shao: ein jhaung mho' ke' ra''.

Lhaovo ra'' su-na qi: qhang nae'' wa nao ngo Lhao nau'' ra'' qo yao ngaid a-va'' o''.

Aug' Bam Z-lau:

2009 thao'' 2010 joe'' Lhaovo bam ra'' ayo, joe'' va'' ra''

Ana'' ba wa 2010 ra'' sao qhid' blog tung'' ru ngaid, 2009 zin re ngaui bau: taung'' qo'' lai ru we' d-khyo'' 2010 re re: ngaui bau taung'' qo'' na ye'' lo'' nae'' ein lam'' ra''.

2009 re mungkan mae boe'' doe, lai ra'' a khyo bam d-jhid' re mhyae: ra'' gu ta'' lang ga: lao'' American mang: mae sao qhid' lhang ra'' Sh-no' Dammada' boe'' lo va'', ai thao re mung kan mae qi'' thao'' ra'' ngaui qhang qug' khai khyo( Global Recession and Economics Crisis) qhug' bam va''.

Mungkan mae mang qi'' dig ra'' nghaui'' sang Micheal Jackson ( King of Pop) re: shid' pye' va'', myen mang: mae'' au jhaung boe'' lo nae'' Mhyi'' zang re re Asuya' bam nhao yo, joe'' ru m-nhao byid' ru tho' xo' yang taung'' to'' ru re qhug' va''.

Lhaovo bam qhid' mae'' 2009 zin wa kha-kyo'' kha qhi'' ngaid laug? Lhaovo kha mhyo'' yaug tan'' xe aung mung: , kha mhyo'' yaug phaji'' maug qo'' zhaung'' yu va''? Taung bug mang: khyo phaji'' ngaui qhang qho nae'' tau kha mhyo'' yaug re dai'' ke' qo'' va''? Tung'' ce' sam'' ve, khyo mae kha kyo'' mae'' qo'' thaug' qhao va' ga'' ra'' ru pe'' re no, no, nag' nag' myid qu'' ca'' va''. 2010 re re m-beim m-lau'' na: pye' nae'' i''?

Zin sag' wa nyhao: nhae qho' ra'' lo, khug mae joe'' na va'', ai re kharu: ci ye'' lo'' nae'' wa nao ngo yaug nge, khag' re khag' ba; ci ra'' mae cao'' yang l-se'' bo: nae'' ngaid. Lhao nau'' bam alhab' joe'' ra'' jo, qo mae Mo''so qhid' , byu myu'' qhid' wa yham sang ra'' mhyi'' pho'' mao; nhaung ba nam ba zo: qi alhab' qhid' mae'' yaung'' lho'' su-na boe'' doe, sho' thaug' qhao na g-lang o'' .

Mo''so Lhaovo qi re min byid na va'', d-yaug we' d-yaug qo khyad', bao'' thaug', dang qhan'' jhid' de, myid re qhid' to: mung, Jeju caung khin'' ra'' myid we' khae: yu na g-lang lhe''

Lhao jhid' z-lau:

Aug' Bam

Happy New Year

Asang ra'' zin na 2009 wa lai lo'' na va'', 2010 ein ra'' zin sag' re khae yu nae'' jin'' jin'' ngaid va'' i''? 2010 wa zin xe lam: d-lam: dam; qhid' ra'' zin ngaid ra'' , c-ra'' zin sag' we' zin xe lam: sag' re tug' yu nae'' tau nhag' lam , myid seim'' nhyang'' gau ngaid nae'' ein lam'' ra''.

Asang mae'' min jhaung: qo'' khae: yu ra'' Lhao nau'' zo: dau qi boe'' doe, nae''tau yaug nge, thaug qhao na g-lang o''.

Good bye 2009

Welcome 2010

Have a Super Successful New Year!!

Merry X'mas Lhaovo

Jhid' de, ra'' Lhao nau'' bam alhab' mo, re ngaui bau'' ra'' A-sang: khau ba ( Merry X'mas) ein lo zaui'' ke' ra'' aw'' . Mungkan mang: jab sho' na: bam ra'' Taung zo: bam re: yao'' mang: we' yao jeju caung'' khin'' ru we' X'mas poe bam re kaid' ko'' ga'' ru lau dao: Radio mae qo'' gyo'' ra''. Ai mae qo'' gyo'' ke' ru wa New Zealand mang: mae wa Lhao lau: de, pho'' Lagang Dau: Khao jui'' au she mung Philippines mang: Manila mae wa Lhao mhyi'' nau'' Khao Zhai'' jui'' au she na ko'' ra'' ga'' ru qo'' gyo'' ra''. Ana'' ru Lhaovo bab yham sang na: ra'' joe'' ra'' jo, qo mae Mo''so re beim'' ru we' jeju caung: khin'' ra'' phaung re bao'' thaug' qo'' ru re Lhao nau'' d-yaug khyo'' mae'' nga: ye, ra''.

ngaid yang re myid qu'' nae'' jao d-lam kam'' wa ai shid' yaug wa Lhao khyo'' m-jhau m-ta'' ko'' ngaid ra'', yao: tao: Lhao khyo'' m-ta'' yang qo myao; ra'' khyo'' ta'' ru m-ngaid lo: , nhyao Lhaovo bam re Lhao myen'' Lhao thoe' khyo'' mea Asang re jeju qo'' caung khin'' re we' yham sang ra'' nhag' te' myen'' khyo'' ngaui bau: taung'' X'mas poe re qo'' kaid' ye'' lo'' shao; ein jhaung mho' ra''. Thao gyo'' ngai na shi'' ra'' yham sang Lhaovo bam re m-to; co' lo bao'' yu thaug' yu g-lang ein qam lao'' ke' ra'' aw''.

Taung zo: bam joe'' na ra'' mang: bam wa USA, Germany, Netherlands, Denmark, Norway, UK, Singapore, Malaysia, Japan , Thai, Philippine we' La-ha mang: bam ngaid ra'' ga'' ru qo'' ba ra''. C-gu mae Lhaovo akhyo myid bo thaug' qhao na ru m-bo shi: ein ta'' re m-shaid' nae''. Ba ga'' va'' Lhao nau'' bam e'' beim'' gyang g-lang se ..

Lhaovo Myo, Jap Qham Phaung ( Lhaovo Conference)

Ana'' au ra'' mang: khyo , phaji'' ju-i khyo , zaui: zo mung ve, khyo , l-lam l-khug we' byu myu'' qi: qhang: ye'' lo'' nae'' khyo mae nao ngo lhao nau'' bam kharu: myid nghae'' thaug' qhao ye'' lo'' nae'' ga'' ru a-qao: bo taung'' myid qu'' gai ra'' o''.

Su byu myu'' bam qi: qhang: ra'' khyo re qu'' mung nhag' ngai: na: m-gai lo:, mug' myid dao mae Lhaovo ein li'' geig' ru wa Lhaovo khyo'' kao daui ca'' va'' ru ngaid ra''. Ngaid m-se'' Lhaovo wa Mo''so phan'' ra'' xao-su byu myu'' myo'' myo mae'' Lhao myen'' mung: ra'' lhaovo bam ngaid ga'' ru myid beim'' qo'' ra''. American, L-ha , G-la we' g-tau byu myu'' bam wa yao: nhaung'' ra'' byu myu'' qhid' mae'' ga g-tau m-myid ngaid m-se'' byu myo'' ra'' m-thao yao: nhaung'' kaid' ra'' mau'' zo'' a-lhab' wa yao'' bam ra'' byu myu'' qhid' mae'' bo gau ngaid va''. C-ra'' byu myu'' bam lao'' khag' re khag' ra'' byu myu'' we' mang: qi: qhang khyo mae thaug' qhao na ko'' ru re qo'' ba ra''.

Myen mang: khug mae'' byu myu'' bam ra'' a-khyo re dam: myid ke' qu'' re nyhao mo' lhaovo bam wa qi: qhang: ban bung'' khyo mae thao'' gyo'' na ra'' ein re m-shaid' nae'', ngaid m-se'' qi: qhang: lo; na ra'' ga'' ru re the' myao yang: ngaui bau'' ra''. Myen, l-sae'', l-ha , g-la , mun , R-khai: , khang'' , ka' yin: , ka'yah'', kachins we' g-tau: byu myu'' m-laug shi'' ra'' bam d-yo je jo, shi'' ga'' ru re laung'' mho'' qu'' va''.

Nyhao mho' lhaovo bam yham sang: ra'' byu myu'' qi: qhang khyo thaug' qhao ye'' lo'' ru mae qug qae'' khyo gai: boe'' ra'' gu'' mae'' yeim'' sho' , gang'' tang ra'' khyo'' mae'' qi: qhang ye'' lo'' nae'' qhid' mae akao'' bo taung'' ba; myid au: she ye'' lo'' g-lang o''.

Kharu: kha-khyo'' dang qhan myid qhug' taung'' zaui'' so'' ye'' lo'' nae'' ga'' ru re Lhaovo mhyi'' pho'' mao: nhaung , mho'' mhyi'' mho'' pho'' , zug' ade bam alhab' leim'' ra'' Lhaovo myo, jap phaung (Lhaovo Conference) d-lam: phyaid deig ra'' khyo'' qo'' kaid' boe'' nae'' ca'' ra'' ein qo'' myao ra''.

Mung dao:

Asang yesu' khau li'' ra'' au re ba: thug' shaid' mae'' phaji'' ba mo, joe'' li'' yang li'' pa'' caung ko'' ga''.

Yao nhaung'' re wa phaji'' ba mo, ngaid mung Mo''so wa phaji'' khyo'' mung kyi mo'' re qhu'' mung khyo shid' ru re qo'' ba ra''. Ngaid yang: re phaji'' ba mo, wa yao; nhaung'' dao'' ngae ra'' khyo'' khyaid' yu a-sang , Jhaung zug re Jhaung zug vang'' mae ye qho ako''. Yao zaung'' mo, re wa kyi qhu'' ngaid m-se'' pe'' m-ba g-nae'' ga Mo''so wa mug' l-gyo: bam re nhao'' ke' mung ngaui bau'' lau dao: ta'' nhao ra''. Ana'' ba Davi' ra'' vo mae khyaid' khyi: yu a-sang khau va'' ga'' mug' l-gyo bam ta'' ra'' dao: re yao zaung'' mo, qo'' gyo mung d-lhang: dae v0 khug khyo lo'' mung Asang re qo'' pa'' caung ako''.

Asang khau thao myao: ra'' byu shid' yaug mae'' d-yaug wa khanae'' re jham: mug sug' nghae' yang na: ra'' khyad' yu a-sang re myid nghae'' na ra'' Shi' maung ga mang: ra'' yaug ngaid. Pa'' caung yham mae jham ba pho'' khin jaung bam myo: myo na ngaid m-se'' myid nghae'' ru we' lao'' na ra'' yaug za: A-sang re qo'' myao ra''. Ai mung dam: d-yaug wa pa'' caung yham khyo khanae'' re ngaui bau taung'' li'' ra'' cug' mo'' myhi'' A-na ga: ru ngaid. Yao wa nhaid' zin za yham thau: qo'' mung cug' mo'' mo'' yang m-sho: m-jhing su; yang lhoi'' ru, goe qu'' ru qhug' ngaid m-se'' myid m-thao'' lo Mo''so re myid nghae'' ru we' pa'' caung yham mae pyo'' ra'' yaug ngaid.

Asang re qhug' thao kao daui ban tha'' lhag' byuag ra'' akhyo re dam; qu'' qu'' g-lang:. Phaji'' ba mo, wa yao nhaung'' ra'' ban mae phug' de, thao'' ra'' jhaung qhu'' re byid ako''. Yao zaung'' mo, wa phaji'' ba mo, ru: ngaui qhang jhaung qhu'' m-qo'' ngaid m-se'' yao: nhaung'' qo'' gyo'' ra'' khyaid' yu a-sang akhyo re ngaui bau: taung'' hau'' kyo'' ako''ga'' ru qo'' myao ra''. Pa'' caung yham mae'' Shu' maung wa '' A-sang we'' ni'' ra'' byu myu'' re khyaid' yu nae'' khyi; yu a-sang re zo: dau ra'' myo, yang qo'' myao va'' mung shid pyo: va'' ga'' ta'' ra'' ''. Cug' mo'' myhi'' wa A-sang re myao lao'' je''ju caung khin'' ra'' ga'' ru re qo'' ba ra''.

Nyhao: nhae qho' ra'' kao daui ban re dam; myid qu'' mung c-ra'' December a-sang khau li'' ra'' ayo, mae a-sang re g-gai: za qhug' va'' i''? ga'' ru yham sang gaung yham sang myid qu'' mung A-sang re khae yu qo'' ra'' zo: dau boe'' ye'' lo'' g-lang . Asang ye-su' re qhug' ra'' yaug wa kao re qo'' ra'', a-sang re m-qo'' yaug wa kao re m-qo'' ga'' ra'' jham: dao: yang qam byid' ke' ra'' o''.

Tho' mae'' mung dao: re Australia mang: Myanmar Baptist Church ra'' Yao zaung'' phung up vo London joe'' ra'' au ta'' ra'' mung dao: mae'' beim'' gu re dam: gae: kyo'' ru ngaid.

Byu d-yaug ra'' ban

Xu-su byu d-yaug boe'' li'' va'' ga: lhao'' wa o mae'' boe'' khyo re qhug' mo, jhaid' ngaid ra''.

Ayo,(Time) , Qam: o: (Energy) , Ngaui Qhang (Money) ce sam ja: wa byu d-yaug ra'' ban mae'' d-lhang dae qo'' yu nae'' gyai qug' ra''. ngai shi'' au: wa Ayo, qo'' Qam: o: qo'' ngaid m-se'' ngaui m-qo'' yang nhag' ngai, myid m-pyo: boe'' nae''. Ve, Qae'' au: wa mau'' zaui ngaui qo'', qam: o: qo'' ngaid m-se'' Ayo, m-qo'' boe'' mung nhag' m-pyo: boe'' nae''. Kao laug mung pyo: pyo: na nae'' yo, re ngaid lao'' wa Ayo, qo'', ngaui qo'' ngaid m-se'' Qam: o: m-qo'' byaug boe'' ra'' byu-na ban re ba: myid lhang: yu mung yham sang ra'' kao daui ban Mo''so nhag' dag ra'' zo: dau boe'' sho' ein ra'' myid we' kao daui ngaid re wa c-ra'' ban za m-ngaid shid ra'' thao; ban qhid' mae'' re ngaui bau'' je''ju re qo'' yu nae'' ga'' lhe''.

Mungkan Bo:lung'' Poe'' Mo''

Joe'' lo nae'' 2010 June khye' re Africa Mug, South Africa mang: mae kaid' nae'' mungkan bo:lung'' poe'' mo''( Fifa world cup 2010) mae kha mang: wa kha mang: we' qhug' pag' nae'' ga'' ru re ana'' myi December 4, 2009 re South Africa mang: mae Le, Zao''( Draw) kaid' yang gae: ke' va'' ru ngaid.

Phung (Group) 8 phung, d-phung mae mang: byid mang: , alhab' re mang: 32 mang: ngaid ra''.

Phung:

A.

1. South Africa

2. Mexico

3. Uruguay

4. France

B.

1. Argentina

2. Nigeria

3. South Korea

4.Greece

C.

1. England

2. United State of America (USA)

3. Algeria

4. Slovenia

D.

1. Germany

2. Australia

3. Serbia

4. Ghana

E.

1. Netherlands

2. Denmark

3. Japan

4. Cameroon

F.

1. Italy

2. Paraguay

3. New Zealand

4. Slovakia

G.

1. Brazil

2. North Korea

3. Ivory Coast

4. Portugal

H.

1. Spain

2. Switzerland

3. Honduras

4. Chile

LHAOVO BLOG MAE'' TUG' YU; RA'': Zin Yo Lam: Shid' Xe Da Ra'' Lhao Nau'' Qo

LHAOVO BLOG MAE'' TUG' YU; RA'': Zin Yo Lam: Shid' Xe Da Ra'' Lhao Nau'' Qo

Zin Yo Lam: Shid' Xe Da Ra'' Lhao Nau'' Qo

Zin Yo Lam: Shid' Xe Da:

Ing''lig' Shophyu: khyo'' wa 21st Century ga:

Lai lo'' va'' zin yo re dam; myid ke' qu'',

Lhaovo ga'' ru kha tau: mae shi''?

Yap mo'' mo'' yang na to'' ru

Lhaovo bam yao: ngaid va'' ru

Khag' yang re: m-nhug' ,

Nhug' yaug' re m-thug'

D-taung gug yo; byid xe khyaug' ,

Shophyu: Sara: yao: za kyaug' kyaug'

Ai thao: d-taung gug yo; ngo'' xe shid' ,

Lhaovo bam beim'' li'' d-jhid' jhid'

Ngaid yang Mo''so khyo phung'' byid ,

D-taung: gug yo nhad' xe byid

Lhao tung'' ga'' ru qo'' yu va'' ,

Mho''pho'' Luka Hhao'' Leim'' kaid' ru ga''

D-taung gug yo; gug xe gug

Je''ju caung'' nae'' a-khyo: thug

Lhao tung'' ce' kao shid' xe ngo''

Go'' lai va'' mhao'' Zam mo'' mhao''

Jhaung yham zam go'' vang''

Lhaovo bam jhad' gyang'' gyang''

Go'' ra'' lhe'' nhaing'' ra'' lhe''

A-sang je''ju caung: khin'' ra'' lhe''

Shid' taung shid' xe byid zin lam:

Lhao tung'' ngo'' xe zin byang dam:

Joe'' lo na ra'' Lhao nau'' e''

Lhao tung'' re re: a zhao'' myhao nhao se lhe''

2024 Lhaovo tung'' ce' for all

Welcome Lhaovo Literature Golden Jubilee

God Bless Lhaovo and Lhaovo Literature