England Mang: Akhyo

March lho'' khye' 27 ba ba mae'' wa England mang: mae'' ayo, re thao khyo dagaung dam; zaid, ke' va'' ru ngaid. Dam: joe'' lo nae'' October lao'' wa qhid' khyo dagaung dam: phyaid ke' zai ngaid ra''. Zin khao: ngo'' March khye' we' October khye' re Ayo, tha'' ako'' ngaid ra''. Ceru: ayo, tha'' ca'' ru wa Englang mang: ra'' myidgye, joqo, mathao yang ngaid ra''. March khye' mae'' wa xaung: thug' va'' ru ngaid ra'' , xaung: re wa ba qhang mung: ne, seim no' deig re'' mug' bo'' mung: myi'' 9 na:yi je joe'' sho' bo'' bao jo, na shi'' ra'' khyo ngaid ra''. Dazin re lho'' khyaug' khe' ba qhang qo'' mung: lho'' khyaug' khye' wa ba bo'' bao re ma-myao boe'' ra''.

Ana'' ba April 9 , bo'' ba re wa Grand National ga'' ra'' myao: khyin poe mo'' re kaid' na bam; ako''. myao: samxe: byid dau: we' myao: jui: bao: 34 yaug khyin: ru re byu 70,000 bam ceim'' qu'' mung: khadau: aso: 1 qo'' nae'' aso: 2, 3, 4,.... qo'' nae'' ga'' ru pe'' re tag, keim'' mung: pyo'' na: bam: ako''. England mang: ra'' sab ja: wa Football we' Myao: jui ngaid ava'' ngaid ra''.

Nyhao mo, Lhaovo bam re: byu qam: mamyo: malaug ngaid mase'' na: ra'' gu yao; yao'' jo,qo mae'' yao'' ayo, we' ayo, phag' mung: khyin poe pe'' re kaid' byid ca'' nae'' ein qo'' myid ra''. Cara'' akhyo wa byumyu'' qi:qhang khyo we' myid qam: qo'' mung: mau'' zo'' zaui: so'' nae'' akhyo , byuna byuye, khyo mae qi: qhang lo nae'' akhyo mo'' dalam: ngaid ra'' ein the' myao ra'' o''.